– Olgguštit sámi ásahusaid

Sámediggeráđđi olggušta sámi ásahusaid go eai leat beassan buktit oaiviliiddiset iežaset dieđáhussii. Dát ii leat duohtá, lohká sámediggeráđelahttu.

Birger Nymo
Foto: NRK

Boahtte mánu galgá Sámedikki dievasčoahkkin meannudit boahttevaš sámi ásahusaid guđajagi dieđáhusa.

– Sámediggeráđđi olggušta sámi ásahusaid go sii eai leat beassan buktit ovdan oaiviliiddiset dán dieđáhussii, oaivvilda Sámeálbmot bellodat.

GULA ÁŠŠI: Olgguštit sámi ásahusaid

Davveriikkalaš čoahkkin

Buot golmma sámedikki ovddasteaddjit deaivvadit Roavvenjárggas Suomas boahtte mánus. Doppe galget earret eará digaštallat sámeásahusaid dieđáhusa.

Dán oktavuođas lea juo ovdalaččat Norgga Sámiid Riikasearvvi parlamentáralaš jođiheaddji, Aili Keskitalo moaitán mo Norgga beale Sámediggi olggušta sámi ásahusaid. Son oaivvilda, ahte dát eai leat beassan cealkit oaivviliiddiset dieđáhussii ovdalgo dat almmuhuvvui.

Dálges lea Sámeálbmot bellodaga vuorru, maiddái sii moitet go sámit ja erenoamažit Sámi ásahusat eai leat beassan buktit oaiviliiddiset boahttevaš sámi ásahusaid dieđáhussii, lohká Sámeálbmot Bellodaga sámedikkeáirras Birger Nymo.

Šiitá čuoččuhusaid

– Gullevaš ásahusain lea leamaš vejolašvuohta buktit cealkámuša dieđáhussii ja lea lunddolaš ahte sis leat oaivilat ovdal digaštallet ášši, lohká sámediggeráđđelahttu Hilde Anita Nyvoll.

– Buohkain lea diehttelasat vuoigatvuohta cuiggodit min, maiddái Sámeálbmot Bellodagas lea dát vuoigatvuohta. Sii livčče almmatge galgan ovddidit cuiggodemiid miessemánu sámedikkedievasčoahkkimis, oaivvilda Nyvoll.