Dáhttu sámi áirasiid mediakommišuvdnii

Sápmelaččat gáibidit beassat mediakommišuvdnii maid kulturdepartemeanta galgá nammadit.

Parlamentarisk leder for Norske Samers Riksforbund, Aili Keskitalo
Foto: Piera Balto / NRK

Kulturdepartemeanta lea bargame nammadit mediakommišuvnna, mii earret eará galgá geahččat preassadoarjjaortnega ja ortnega mas media ii dárbbaš máksit momssa.

– Dárbu muittuhit

Dál gáibidit sápmelaččat beassat dán kommišuvdnii.

Earret eará lea Norgga Sámiid Riikkasearvi reivves kulturministarii Trond Giskii ákkastallan sámi ovddasteami dehálašvuođa. NSR jođiheaddji Aili Keskitalo hástala kulturministara sihkarastit sámi ovddasteami mediakommišuvnnas.

– Lea ain dárbu muittuhit Ráđđehusa man dehálaš lea vuhtiiváldit daid erenoamáš hástalusaid mat leat čadnon sámegillii. Sávan sii atnet dán muittus go mediakommišuvdnadoaibma galgá mearriduvvot, cealká NSR jođiheaddji Aili Keskitalo.

Maiddái sámi lágádus ja aviisasearvi lea čállán reivve dán birra kulturministarii, čállá Ságat.