– Dás gal lea Sámediggeráđđi oalát beahttán, ja mus eai leat sánit Sámediggeráđi barguvuohkkái, lohká NSRa parlamentarálašjođiheaddji Aili Keskitalo.
– Váttis čađahit árvalusaid
Aili Keskitalo ádde bures go máŋga ásahusas dovdet badjelgehččojuvvon ja ahte Sámediggi bágge sidjiide ortnegiid.
– Dát bargovuohki dagaha gulahallama ovdii, ja nu šaddá ge váttisin čađahit evttohuvvon doaimmaid, cealká Aili Keskitalo (NSR).
Ferte gulaskuddami
NSR gáibida dál ahte Sámediggeráđi dieđáhus ásahusaid birra álggos sáddejuvvo gulaskuddamii daid ásahusaide geasa guoská, ovdal go Sámediggi meannuda ášši. - Dat lea áidna mii lea riekta dán áššis go Sámediggi ferte čájehit ahte mii váldit sámi ásahusaid duođas, gáibida Aili Keskitalo. NSR oaidnu lea goit nu ahte ásahusat buoremusat dihtet masa lea dárbu.
Hárdá olbmuid
Sámediggeráđđi lea álmmuhan dieđáhusa sámi ásahusaid birra gos earret eará evttohuvvo ovttastahttit ásahusaid ja rievdadit ásahusaid stivrraid nu ahte Sámediggi ge beassá nammadit stivralahtuid daid ásahusaide mat ožžot ruđalaš doarjaga Sámedikkis.
– Sii gal badjilgehččet nu go Márkomeannu go dás eai leat gulahallan ja orrot bággemin searvvi, lohká Márkomeanu festivalajođiheaddji Beatrice Fløystad.
