NRK Meny
Normal

Moaitá giellaruđaid geavaheami

Norgga Sámiid Riikkasearvi (NSR) moaitá go Deanu gielda joatká geavaheamas guovttegielalašvuođa ruđaid gokčat Deanu sámeskuvlla loatnagoluid.

Trond Are Anti
Foto: Nils Henrik Måsø / NRK

GULDAL: Guovttegielalaš ruđat

NSR sámediggeáirras Trond Are Anti dáhttu Sámedikkis čielga vástádusa ahte leago dohkálaš geavahit guovttegielalašvuođa ruđaid máksit Deanu sámeskuvlla jođihan- ja loatna- ja reantogoluid.

Nu movt ovddit jagiid, de Deanu gielddastivrra eanetlohku lea mearridan maiddái boahtte jagi geavahit oasi guovttegielalašvuođa ruđain máksit daid goluid.

Ii nagot bálvalit álbmoga

NSR Trond Are Anti eahpida lobálašvuođa dás.

– Nugo mii diehtit, galget guovttegielalašvuođaruđat mannat álbmoga bálvat njálmmalaččat ja čálalaččat. Daidda liigegoluide galggašii gielda atnit ruđaid, muhto dan ii daga dál. Nu ahte dás lea badjel 2 ja bealle miljon ruvnno geavaheame áibbas eará doaimmaide, dadjá Anti.

Dál son gáibida čielga vástádusa Sámedikkis, ahte lea go dát lobálaš.

Áigot geahčadit ođđasit

Marianne Balto

Sámedikki ráđđelahttu Marianne Balto (Bargiidbellodat)

Foto: Thor Thrane / NRK

Muhto sámediggeráđđelahttu Marianne Balto ii sáhte vel vástidit čielgasit:

– Sámediggeráđđi lea bargame ođđa njuolggadusaid maid áigut gárvvistit ovdal go meannudit ođđa bušeahta. Mii leat oaidnán ahte njuolggadusat ja gáibádusat eai leat nu čielgasat, dadjá Balto.