-Listhauga iežas sivva
-Ii oktage eará go Listhaug ieš leat sivalaš dillái mii lea čuožžilan, oaivvilda Guovddášbellodaga jođiheaddji Marit Arnstad.
Justis- ja gearggusvuođaministar lea dakkár geasa olbmot galget dovdat luohttámuša, mihá eanet go ovttage eará ministarii. Álbmot galgá sáhttit luohttit juste dán ráđđehuslahttui, ahte son sáhttá čoavdit smávit ja stuorát roasuid buori ja čorgadis vuogi mielde.
-Dá lea dat luohttámuš man Listhaug ii nagodan hukset, dajai Arnstad Stuoradikki sárdnestuolus odne.