– Kvar einaste dag er det folk som ringer og spør etter ved, seier Jøran Oseland.
Han er teknisk ansvarleg i Arboretet i Sandnes. Der har dei produsert 100 pallar med ved. Men alt i april var den lova vekk.
– Eg trur nesten me kunne selt tusen pallar, seier vedprodusenten.
Vedbestillingar for vinteren 2023-24 har også tikka inn. Rekordhøge straumprisar og spådommar om ytterlegare dobling til vinteren er bakteppet.
– Mange som ikkje fekk ved i vinter spurte om å få stå på liste til neste år. Nå har om lag 50 personar sagt dei vil ha og me må drøya og sjå kva me klarer å produsera.
Vedsekkar stolne
Vedprodusent Ole Aanestad (21) i Sandnes opplever også at bestillingane renn inn. Han var utselt for ved i februar. Til neste år satsar han på å dobla produksjonen.
– Det er veldig gode tider, helst for mykje av det gode.
21-åringen har til og med opplevd at vedsekker er stolne frå traktorhengaren.
– Det har gjort at eg må ha med meg folk som kan passa veden mens eg er vekke.
Ein som var tidleg nok ute til å få vinterens ved i hus er Per Ellingsæter frå Sandnes.
– Prisane på straum blir heilt feil, men me får fyra med ved.
– Kor mykje ved kjem det til å gå?
– Halvannan famn, reknar eg med (tre pallar, journ. merk.)
Varehus tidobla vedsalet
I takt med etterspurnaden stig prisen på ved. Mange må betala dobbelt så mykje som dei gjorde i fjor.
Coop sel millionar av vedsekker og har skrudd opp prisen med over 100 prosent. Likevel strøymer kundane til.
Obs Bygg i Sandnes har åleine selt 5000 vedsekker i august, lenge før rogalendingane for alvor har begynt å fyra i peisen. Det er ei tidobling samanlikna med august i fjor.
– Det er heilt ekstremt. Me har aldri opplevd at vedsesongen har starta så tidleg før. Varehusa våre hadde ein bonanza på sal av ved alt i starten av august, seier regiondirektør i Coop Noreg, Dag Ove Aksland.
– Ikkje få panikk
Han fortel at det er stor konkurranse om veden, men ber likevel folk om å ikkje få panikk.
– Me gjer bestillingane våre tidleg på året og har lagt opp til at me skal ha ein god tilgang på ved gjennom heile vintersesongen i år.
Regiondirektøren kan likevel ikkje utelukka mindre periodar der dei står utan ved.
Det er heller ikkje slik at varehuset gnir seg i hendene, trass høge vedprisar i butikkane.
– Ved har aldri vore nokon god butikk for oss, og det er det heller ikkje nå, seier Aksland kontant.