Arkitekten er svak for Ullandhaug

Det nye sjukehuset i Rogaland skal anten byggast på Våland, på Ullandhaug nedanfor Universitetet i Stavanger eller på Stokka i Sandnes.

• LES OGSÅ: Blir dette den nye sykehustomten?

– Utviklingspotensialet på Ullandhaug er stort

Arkitekten bak dei tre skissene var i dag på høyringsmøte for det nye sjukehuset, og avslørte at det er eitt alternativ han er litt svak for.

– Utviklingspotensialet på Ullandhaug er spesielt stort, men det er berre sett frå ein fagleg ståstad som arkitekt, ikkje regionale omsyn og utvikling av sjukehuset, seier Johannes Eggen, arkitekt i Nordic COWI.

– Ullandhaug er nærme universitetet. Eit alternativ med sjukehus, universitet og næringsutvikling knytt saman og ikkje langt frå Forus, det vil gjera det kompetansemiljøet Stavanger er kjent for sterkare, seier han.

– Ein del arbeid att

Frå før er det også kjent at universitetet og næringslivet i regionen er tilhengarar av Ullandhaug-alternativet.

• LES OGSÅ: Dette kan bli det nye sykehuset i Stavanger
• LES OGSÅ: Lokalpolitikerne vil ikke overlate valget av sykehusplassering til staten

Fristen for å seia si meining om kvar det skal byggast, går ut om ein månad. Difor ville sjukehusdirektøren i dag gi meir informasjon om prosjektet til kommunar, fylke og næringsliv. Men sjukehusdirektøren vil ikkje flagga ein favoritt endå.

– Eg kjem ikkje til å seia noko om kva eg likar best på noverande tidspunkt. Det er framleis ein del arbeids att før me kan ta det endelege valet og gi våre anbefalingar til styret, seier Cathrine Bryne, administrerande direktør ved Stavanger universitetssjukehus.