Førre veke blei mannen i 50-åra som er sikta for drapet på Birgitte Tengs i 1995 avhøyrt for første gong sidan oktober.
– I avhøyret har sikta saman med sin forsvarar sett fram eit kravsmål om nye etterforskingsskritt som dei ønsker gjennomført, seier politiadvokat Fredrik Martin Soma.
Frå sikta sin forsvarar får NRK opplyst at det i hovudsak handlar om å få politiet til å oppklara konkrete dato og tidspunkt, samt avhøyr av personar som har vore i nærområdet på interessante tidspunkt.
Sikta har gått gjennom saksdokument
Politiet er likevel tilbakehaldne med opplysingar rundt dei nye etterforskingsskritta.
– Det handlar i hovudsak om nokre nye vitneavhøyr og undersøkingar, som me nå er i gang med. Dette vil me jobba med fram mot sommaren, seier Soma.
Den sikta skal ha sjølv ha ønska det nye avhøyret, ifølgje forsvarar Stian Kristensen.
– Han har over tid nå gått gjennom vitneforklaringar som blei gitt for over 20 år tilbake i tid, for å sjå korleis det kan hjelpa på minnet. Det er med bakgrunn i dette han har bede om diverse etterforskingsskritt og bede politiet om å undersøka konkrete ting, seier Kristensen.
– Korleis har din klient opplevd desse avhøyra, han har jo ikkje vore avhøyrd sidan i haust?
– For han har desse månadane vore tunge. Han har vore klar heilt frå starten på at han er uskuldig, at han ikkje har noko med dette å gjere. For han var det eit gode å få lov å koma i eit avhøyr no og be om at politiet sjekkar ut konkrete opplysningar.
Tidsfrist står i fare
Dei nye etterforskingsskritta betyr at politiet si målsetjing om å vera ferdig etterforska i løpet av juni kan ryka. Soma meiner likevel at framdriftsplanen etter sommaren i står ved lag.
– Kva meir kom fram i avhøyret?
– Eg vil ikkje gå inn på kva sikta er avhøyrt om denne gongen. Det har vore spørsmål stilt til han som han har svart på, så har han også kome med kravsmål om desse etterforskingsskritta, seier han.
– Samarbeider han godt?
– Han stiller i avhøyr, svarer på spørsmåla han blir stilt og fått tilbod om å kommentera bevis i saka, så vil eg ikkje seia noko meir om avhøyrssituasjonen, seier Soma.
Jørgensen-avhøyr rett rundt hjørnet
Mannen i 50-åra er også mistenkt for å stå bak drapet på Tina Jørgensen i 2000. Men tema for dette avhøyret var utelukkande Tengs-saka.
– I dette avhøyret bad han om etterforskingsskritt og svarte på spørsmål ut frå si eiga forklaring. Det var ikkje eit avhøyr der politiet stilte spørsmål som dei hadde klar på førehand, seier forsvarar Stian Kristensen.
Ifølgje Soma er det planlagt nytt avhøyr der mannen også skal svara på spørsmål om Jørgensen-saka.
Dette vil truleg også skje i løpet av juni.
– Vil dette avhøyret utelukkande handla om Jørgensen-saka?
– Me har framleis ikkje tatt stilling til korleis me skal løysa det, avsluttar Soma.
Det er planlagt at rettssaka mot mannen skal ta til i slutten av oktober i år. Haugaland og Sunnhordland tingrett er bedt om å sette av ein periode på tolv veker.