– Dei beviste allereie mot Viking førre helg at dei klarer å stenga støyen rundt klubben ute. Det er klart at dei får mykje gratis motivasjon i eit lokalderby, men også på treningsfeltet har dei hatt veldig fint fokus og god kvalitet på øktene, seier nåverande FKH-trenar Andrea Loberto til NRK timar før dei møter Rosenborg på Lerkendal.
For trenar-situasjonen i klubben etter Dempsey-avgangen er framleis ikkje avklart. Sjølv om Andrea Loberto ønsker å vera hovudtrenar, så er det kjent at klubben er i samtalar med G19-landslagstrenar og tidlegare Haugesund-assistent Eirik Horneland.
- Les òg:
- Les òg:
Kjenner Rosenborg godt
I dagens kamp er det kanskje Loberto som er lagets viktigaste kort. Han kom nemleg til FK Haugesund frå Rosenborg, der han jobba med unge spelarar og analyse av kampar.
Denne kunnskapen, seier trenaren, skal dei bruke for det den er verd.
– Me har førebudd oss som me plar, men kanskje ekstra nøye i forkant av denne kampen, fordi eg har jobba der og kjenner måten dei ønsker å spela på. Eg kjenner styrkane deira og samstundes veikskapane deira, fortel Loberto.
Men Rosenborg er ingen lett motstandar uansett om ein kjenner veikskapane deira eller ikkje.
– Dei fleste kjenner måten Rosenborg spelar fotball på. Styrken deira er at samhandlinga sit såpass godt, når det først funkar så funkar det veldig effektivt, seier Loberto.
Luktar på fjerdeplassen
Dersom FKH vinn dagens kamp så klatrar dei opp på ein sterk fjerdeplass på tabellen. Noko Loberto meiner er fullt mogleg.
– Me trur me skal klara å gi Rosenborg utfordringar, og me har tidlegare vist på heimebane at me kan matcha dei. Derfor har me absolutt trua på at me kan vinna denne kampen, seier Loberto.
Det skal i alle fall ikkje stå på spelarane sitt fokus, legg han til.
– Spelarane er ekstremt profesjonelle, seier han.