Det skjer noko rart på Nord-Jæren

Direktøren i kollektivselskapet Kolumbus sit med utskrift av passasjerstatistikken framføre seg på kontoret. Den viser i overkant av 1,8 millionar reiser med buss på Nord-Jæren i september månad.

– På dei seks åra eg har vore i Kolumbus har me aldri hatt så mange reisande på ein månad, slår Odd Aksland fast.

Nye rekordar

Innbyggjarane på Nord-Jæren har aldri vore eit kollektiv-elskande folk. Berre sju prosent av husstandane var utan bil i 2013. 45 prosent hadde ein bil, 48 prosent hadde to eller fleire bilar.

• Les også: - Det er lavstatus å ta bussen

Det er mot dette bakteppet at 2017 står fram som året då det skjedde eit skifte. Til og med september, har talet på busspassasjerar auka med 8 prosent.

Samstundes har biltrafikken gått tilbake med 2,3 prosent.

Sjølv gruppeleiaren for Miljøpartiet dei grøne i Stavanger, Torfinn Ingeborgrud, er imponert over kva som har skjedd.

– Nokre vil nok seie at dette skuldast nedturen i oljenæringa som er så viktig for området, men eg trur at det er ein varig trend som kjem til å fortsetje, seier han.

Ingeborgrud viser også til at både talet på togpassasjerar og syklande i området, går opp.

Folk tilpassar seg

I Stavanger sentrum møter me Jorunn Elin Haga, som har tatt bussen til byen i dag.

– Eg er med i Heim-jobb-heim-ordninga og det betyr at det er billegare å reise kollektivt. Eg syklar om sommaren, men frå november er eg over på buss, seier Jorunn Elin Haga.

• Les også: Tilbyr buss, tog og elsykkel for 500 kroner i måneden

Bjørn Sæbø frå Sola har nettopp gått av bussen i sentrum.

– Kona skulle ha bilen så då fant eg ut at eg skulle ta bussen, så slepp eg å slita med å finna parkering og slikt, seier han.

Sæbø tar ikkje mykje buss, men med innføring av piggdekkavgift til vinteren og høgare bompengar til neste år, så kan det nok skje oftare i tida framover, vedgår han.

Noko skjedde i 2017

Nye bussar, nye ruter og større frekvens i rutene. Alt dette blei gjennomført i fjor. Dette året har resultatet vist seg.

• Les også: Tidenes største bussomlegging

Jørgen Aarhaug er forskar ved Transportøkonomisk Institutt og veit at når kollektivtilbodet blir billegare og betre, og når det blir dyrare og vanskelegare å køyre personbil, ja, så aukar passasjertalet på bussen.

– I tillegg så er det ein trend dette, seier Aarhaug.

Han viser til at byområda Bergen, Trondheim og Oslo alle har same tendensen og at den også er tydlegare enn i Stavangerområdet.

– Så skal du heller ikkje sjå vekk frå at innføring av dyrare bompengar om eitt års tid, får fleire til å teste ut nye reisemåtar, seier Aarhaug.

• LES OGSÅ: Digital betaling og høyere kontantpris gir flere busspassasjerer