Maritimt forum ønskjer meir godstransport og persontrafikk frå land til sjø, og påpeikar at det ikkje kostar noko å halda ved like havet.
– Havet er den einaste gratis firefeltsvegen me har. Det trengst ikkje leggjast ny asfalt eller midtrabattar på sjøen, seier dagleg leiar i Maritimt forum for Haugaland og Sunnhordland, Solveig Røkenes.
Mange har reagert
Tidlegare denne veka blei det kjent at Flaggruten blir lagt ned – etter 53 års teneste mellom Stavanger og Bergen.
Mange har reagert på at hurtigbåttilbodet forsvinn frå nyttår, og både turistnæringa og næringslivet har tidlegare denne veka gitt sin støtte til å oppretthalda Flaggruten.
Det viste seg at samferdselsutvalet i Rogaland ikkje visste at politikarkollegaene i Hordaland skulle legga ned ruta.
Reiarselskapet Fjord Line kasta seg også på banen i debatten, og sa at dei kan ta over Flaggruten sitt rutetilbod mellom Bergen og Stavanger.
– Einaste beredskapen
Maritimt forum stiller seg nå i rekkja av støttespelarar for hurtigbåtruta mellom dei to store vestlandsbyane.
– Dette er dårleg maritim politikk med tanke på nærskipsfarten. Og dersom vegnettet skulle falla saman, er sjøen den einaste beredskapsåra me har i tillegg til luftvegen, påpeikar Røkenes.
Sjå TV-sak om nedlegginga:
VIDEO: Flaggruten mellom Stavanger og Bergen blir lagt ned frå nyttår.
