Meiner miljøkrav slår urettferdig ut

– Det er ikkje liv i det heile tatt. Det ligg korn der, men det har ikkje spira.

Bondelagsleiaren i Marker, Sven-Ole Nesset, fortviler over sine knusktørre jorde. Det er ikkje antydning til noko som minner om grøne spirer i jorda.

Han meiner situasjonen ikkje berre skuldast mangelen på regnvêr.

Nesten halvparten av åkeren til Nesset kjem under regionale miljøkrav. Ifølge krava har han ikkje lov til å pløye eller så korn om hausten.

Jorda hans ligg i nærleiken av Haldenvassdraget. Vatnet renn sørover og endar i Iddefjorden ikkje langt frå innseglinga til Oslofjorden.

Avrenning frå jordbruk er ein av dei store forureiningskjeldene i Oslofjorden. Med å ikkje pløye om hausten, blir forureininga redusert fordi færre skadelege næringsstoff og jordpartiklar renner ut i elver og vassdrag.

– I praksis betyr det at eg ikkje får den avlinga eg vanlegvis får når eg kan så haustkorn, seier Nesset.

Femårig plan

I 2021 blei det lagt fram ein femårig plan for at Oslofjorden skal få ein god miljøstand. Planen inneheld 63 konkrete tiltak, og 19 kunnskapstiltak.

Nesset erkjenner at forureining er eit problem, men meiner at krava gjer at nokre bønder i Oslo og Viken blir ramma dobbelt når det er tørke.

– Me er veldig utsett. Sånn som me har fått det i år med tørke så slit me med å få det til å spire.

– Riktig for dei aller fleste

Divisjonsdirektør i Nibio, Thomas Hartnik, erkjenner at krava går utover nokre bønder økonomisk.

– Det er ikkje sånn at det er det riktige på alle område, men det er riktig for dei aller fleste at ein innfører miljøtiltak.

– Då kan ein stimulere gjennom tilskot til å bidra til ein litt meir miljø- og klimavennleg retning, seier Hartnik.

Nesset meiner miljøkrava slår urettferdig ut.

– Me har gjort fleire tiltak som er gjennomført over fleire år. Me har gjort det me kan for å ta vare på jorda vår så godt me kan. Likevel får me miljøkrav på oss.