Dette året har Espen Nakstad blitt ein namn og eit andlet fleire kjenner igjen i forbindelse med pandemien. VG og Dagbladet kåra han til årets namn i midten av desember, og han har blitt hylla av fleire for dei ulike tiltaka som har blitt setne i verk.
Ein av dei som er imponert over måten Nakstad har handtert pandemien på, er konstituert overlege ved intensivavdelinga på sjukehuset i Tønsberg, Pål Wold Morberg.
Såpass nøgd er han at han, saman med kona si og ein kamerat, sel genserar og t-skjorter med eit bilete av Nakstad trykka på brystet.
– Vi begynte nesten nettopp å selje dei, og så langt har det blitt selt 44 t-skjorter og genserar.
På grunn av rettigheitene til bilete har dei berre lov å selje 500 av dei, så det blir eksklusive plagg som sendast i posten til kjøparane.
Avhengige av tiltaka
Han, kona Trude og hjernekirurg Vidar Stenset fekk idéen etter at pandemien sette inn og det vart innført tiltak.
– I mars opplevde me veldig mange pasientar med covid, og det var ei vanskeleg tid. For sjølv om me har moderne utstyr og medisinar, følte me oss makteslause ovanfor dei pasientane som var sjukast. Difor er me helt avhengige av tiltaka som vart sett inn av myndigheitene, slik at me kan gi den behandlinga me kan til dei som treng det.
Før jul gjekk han med ei t-skjorte med Nakstad sitt andlet på. Etter å ha fått fleire spørsmål om kvar han hadde fått tak i den, fann han, kona og Stenset ut at dei skulle prøve å selje nokre genserar og t-skjorter med motivet.
På nettsida skriv dei:
Vil ikkje bruke den sjølv
– Eg har ikkje sett genserane sjølv, men tenker det er ein morosam idé, seier hovudpersonen sjølv, assisterande direktør i Helsedirektoratet, Espen Nakstad.
Han fortel at han hadde høyrd om prosjektet på førehand, men at han ikkje var heilt sikker på korleis det skulle fungere, eller storleiken på det.
– Kunne du kjøpt deg ein sånn genser sjølv?
– Eg trur kanskje ikkje eg skal gå rundt med ein slik genser med bilete av meg sjølv, men andre må gjerne gjere det om dei vil det. Det går heilt fint for min del, seier han lattermildt.
– Ein «posterboy» for kloke val
Wold Morberg seier det er deira måte å takke for tiltaka som har blitt gjort.
– Me som jobbar i helsevesenet er heilt prisgitt at folk held avstand og gjer kloke val, seier han og seier illustrasjonen av Nakstad på t-skjorta kan gi litt tankar til illustrasjonen av den kjente revolusjonsleiaren, Che Guevara.
– Ein «posterboy» for kloke val synest me er ein morosam måte å takke på. Eg føler han har blitt eit universalt og positivt andlet i denne koronatida, og så skal overskotet av pengane me får inn gå til å støtte Leger utan grenser.
Det er noko Nakstad støtter.
– Det tenker eg er eit godt formål. Det er ein organisasjon eg har støtta tidlegare, og dei gjer eit godt arbeid i land som treng helsetenester enno meir enn i Noreg.
Kommunikasjonssjef i Leger utan grenser, Silje Grytten, seier dei er glade for alle gåver og bidrag dei får inn.
– 95 prosent av inntektene våre kjem frå private givarar, så me er heilt avhengige av at både privatpersonar og selskap støtter oss. Det er einaste grunnen til at me kan gi den hjelpa me kan. Me har over 400 prosjekt i meir enn 70 land, og set difor pris på alt me kan få inn.