– Det vart «pangopning» med ein gong det. Det rann inn folk etter ordinær stengetid. Midt på natta, ler Bodil Midtsveen.
I ei årrekke har kundane møtt det blide fjeset til Midtsveen bak kassaapparatet i det vesle landhandleriet i Flesberg. Nærbutikken langs fylkesvegen i Numedal har eksistert sidan 1947.
Dei siste åra har det blitt stadig tøffare å drive nærbutikk i distrikta. Men i dag har Midtsveen endå større grunn til å smile breitt.
– No hender det at eg har halve omsetninga etter stengjetid laurdag, fortel ho.
Måtte tilsette hjelp for å møte auka etterspurnad
I 2020 sa ho ja til å delta i eit nasjonalt prøveprosjekt som skulle styrke butikkar i små bygdesamfunn. Investeringsstøtte frå det såkalla Merkurprosjektet i kommunaldepartementet, gjorde det mogleg å starte ein sjølvbetent og døgnopen butikk.
– Då tenkte eg at dette må vere framtida, fortel Midtsveen og legg til:
– Det var berre å bygge om. Kaste ut den gamle kassa, få inn ein sjølvbetent ein. Inn med kamera i taket, og kortautomat ute så folk registrerer seg for å gå inn.
Ho innrømmer at det var litt skummelt. Å starte på nytt, med moglegheita for at folk kan gå ut og inn til alle tider av døgnet. Men det nye systemet vart ein suksess. Berre i løpet av det første året steig omsetninga med heile 37 prosent. Det utgjer 2 millionar kroner i auka sal.
Og ho er ikkje åleine. Dei åtte fyrste butikkane som fekk støtte frå Merkurprosjektet opplevde ein omsetningsauke på 33 prosent.
I Flesberg har Midtsveen blitt nøydd til å tilsette ekstrahjelp for å møte etterspurnaden frå kundane.
Statsråden imponert: – Døme på politikk som verkar
Sidan oppstarten har 40 nærbutikkar i distrikta delteke i pilotprosjektet.
– Eg skulle gjerne hatt ein slik butikk der eg bur, ler kommunal og distriktsminister Sigbjørn Gjelsvik, som for høvet besøker landhandleriet i Flesberg.
Han er imponert over kva Midtsveen har fått til i den vesle butikken, og kallar det ein gedigen suksess når han høyrer at butikken har hatt ein omsetningsauke.
– Dette er eit døme på politikk som verkar, og som kanskje verka betre enn vi hadde sett for oss på førehand. Dette er ikkje dei store beløpa i ein statsbudsjettsamanheng, men for denne butikken og dette lokalsamfunnet er det viktige pengar, seier Gjelsvik.
– Herleg å ha ein butikk open heile tida
I butikken møter vi Hanne Bryggmann som akkurat har låst seg inn. Ho har valt nærbutikken, framfor ein av dei større butikkane lenger ned i bygda.
– Veldig kjekt å dra innom her. Eg jobbar ein del kveldar, så herleg å berre ha ein butikk open heile tida.
– Kor ofte handlar du her?
– Det blir fleire gonger i veka, svarer Bryggmann, som fortel at ho for det meste er innom på kvelden etter jobb.
Statsråden lovar at regjeringa framleis skal jobbe for å vareta nærbutikkar i små lokalsamfunn. Fordi det sikrar tilflytting og held oppe busetting i bygdene. I mellomtida må butikkeigaren brette opp ermane.
– Kvardagen har ikkje blitt noko lettare. Eg må jobbe heile tida. Det må vere orden i butikken og eg må stadig fylle opp hyllene, seier ein framleis smilande Midtsveen.
– Vil du tilrå andre å gjere det same?
– Ja, absolutt. Det er mange nedslitne butikkar. Vi må følgje med i tida. Skal ein drive butikk i Distrikts-Norge må ein begynne med dette.