Sámi studeanttaid searvi Davvi-Norggas lea finadan universitehtas Romssas rekrutteremin ođđa miellahttuid.

Anne Hedvig Salmi Nordsletta (24) ja Hannah Sire Kristoffersen Noste (21) geat leaba searvvi stivrras, muitaleaba maid searvi bargá ja mo sáhttá šaddat miellahtun.

– Moai vigge olbmuid oččodit šaddat miellahtun Sámi Studeanttaid Searvái Davvi-Norggas, ja oahpásnuvvat minguin ja oahpásnuhttit veahá dáppe campusas.

Ovdamunit leat miellahttun SSDNas leat vuosttažettiin ahte beasat oahpásmuvvat eará sámi studeanttaiguin ja ovttastallat singuin earret eará feastain maid searvi lágida, ja eara čoagganemin.

Sámit oahpásmuvvet eará sámiiguin

– Mii lágidit diekkár sosiála eahkediid gos beassá oahpásmuvvat eará sámi studeanttaiguin ja maiddái beassá oaidnalit eará sápmelaččaiguin geat orrot dáppe.

Studeantta guovtto mielas lea dehálaš searvat universitehta DebutUkas dahje rahpanvahkus, mii lea juohke čavčča ođđa skuvlajagi álggus.

Álggus jagis leat ollu ođđa studeanttat geat soitet dárbbašit dorvvu.

– Lea hui dehálaš leat oidnosis go dál han álget ollu ođđa sámi studeanttat, ja jus sii leat aitto fárren eret ruovttus, ja buot lea veahá ođas ja issoras, de lea hui buorre gávdnat eará sápmelaččaid.

– Beassat sámástit ja oahpásmuvvat eará sápmelaččaiguin.

• Loga maid: Tilbys stipend for å lære om Jesus

Masa sáhtát illudit go leat miellahtu?

Boahtte mánu searvi lea lágideamen semesterálgofeastta gos olbmot sáhttet oahpásmuvvat. Sáhtát maiddái illudit vel juovllaide, soai muitaleaba.

– Dán jagi mii áigut fas doallat juovlabeavddi, dat lea leamašan hui bivnnut ovdal. Dohko lávejedje hui ollusat boahtit.

Searvvis lea jo oalle ođđa stivra, muhto boahtte mánu go leat ođđa miellahtut boahtán galget fas ođasmahttit stivrra.

– Dat mii lea dehálaš dál go bohtet ođđa miellahttut, lea ahte mii válljet ođđa stivvra fas.

Soai ávžžuheaba olbmuid áinnas váldit oktavuođa servviin jus leat makkárge gažaldagat.

Jus leat makkárge gažaldagat de lea beare daid sáddestit midjiide facebook-siidui, ja mii geahččalit vástidit nu jođánit go vejolaš.

• Loga maid: Ønsker å samle samisk ungdom

Makkár doaibma searvvis lea

– Leat ollu dehálaš doaimmat maid dát searvi ovddida, nugo buoridit sámi studeanttaid fágalaš, sosiálalaš ja ekonomalaš dili. Mis lea maid ovttasbargu eará sámi organisašuvnnaiguin.

Nordsletta ja Noste muitaleaba ahte sii leat bargan ollu maŋŋemus jagi oažžut sámi ovddasteaddji Studentparlamentii.

– Dat lea hui dehálaš ahte sápmelaččain lea representántta, ja ahte SSDNas lea representántta Studentparlamentas.

Soai muitaleaba loahpas searvvi atnit dehálažžan ahte sámegiella gullo universitehta birrasis, ja ahte sii ieža fertejit bargat ollu dáinna áššiin.