NRK Meny

«Čievččas dáža bahtii ja čále liikká sámegillii»

– Mun jáhkán 90 proseanta dain geat čállet sámegiela, eai leat oba vásihange giellapolitiija – jus it leat Ártegis Ságat-siidui čákŋan, dat gal sáhttá leat dego vieksábeassi, čállá Maret Laila Anti bloggastis.

Maret Laila Anti ja su bloggačálus

GIELLABEROŠTEADDJI BLOGGÁR: Maret Laila Anti lea iežas bloggas álmmuhan čállosa mas earret eará ávžžuha sámegillii čállit sosiála mediain.

Foto: Skjermdump fra blogg / privat

Artikkelen er mer enn ett år gammel.

– Don leat liikká joavdelastimin sosiála mediain, manne vel it bargga juoga mii lea buorrin buohkaide? Jos oaivvildat ahte ii leat doarvái čielga giella, de lea sámástit sosiála mediain buorre giellaovdáneapmái.

Son cealká iežas dolkan oaidnit sámegielhálliid (ja -čálliid) geat dárogillii čállet sosiála median.

Giellaberošteaddji, Maret Laila Anti, viggá iežas blogga bokte movttiidahttit eanet sámegielgeavaheapmái nu go ovdamearkka dihtii Facebookas.

Garra sánit

Bloggas son muhtin sajiin, beanta garra sániiguin, imašta manin sámegielagat nu dárustit sosiála median.

Son háliida fuomášuhttit ahte son čállá priváhtaolmmožin, iige iežas virggi dahje bargosaji namas.

Anti lea čállán vihtta čilgehusa maid son ii áiddo oru dohkkeheamen, maid dávjá gullá sámegielagiin geat eai čále sámegillii.

Dát leat oasit dán viđa čuoggás:

– It don gal njoammelhiita leat?

  • «Mun balan giellapolitiijas, danne in čále sámegillii».

– Leago dát dušše ágga dus go it gille čállit sámegiela, vai leago dát duohta balddonas? Ja jus lea balddonas, it don nu njoammelhiita gal leat ahte it arvva iežat eatnigiela čállit?

– Jáhkán 90 proseanta dain geat čállet sámegiela, eai leat oba vásihange giellapolitiija (jus it leat Ártegis Ságaid siidui čákŋan, dat gal sáhttá leat dego vieksábeassi).

– Ja jus vel válddahalatge giellapolitiijai, de ferte maid smiehttat manne olbmot cuigot.

– Muhto lea buorre dáhtus, sis dušše eai leat sosiála attáldagat. Gávdnojit gal hui hárvenaš «giellagáhttejeaddjit» geat leat dušše vuortnuheamen. Ále divtte dáid iežat vuorjat.

Samisk læremateriell

VEAHKENEAVVUT VALLJIS: Oahppo- ja sátnegirjjit gávdnojit gal doarvái, jos háliida eanet geavahit sámegiela.

Foto: Tor-Emil Schanche / NRK

– Čievččas dáža bahtii

  • «Jo, mus lea eatnigiellan sámegiella, muhto skuvlla váccedettiin «dolin» in oahppan čállit sámegiela».

– Dás ferte smiehttat manne dáža gilddii sámegiela skuvllas. Na, dat lei jávkadit sámegiela, čállá Anti, ja lasiha:

– Čievččas dáža bahtii ja čále liikká sámegillii, ále divtte su vuoitit! Don máhtát eanet go jáhkát.

  • «Mun lean nuorra olmmoš ja háliidan ollu likesaid ja ahte buohkat áddejit maid čálán. Danne hilggun sámegiela»

– Jus dus lea sámegiella eatnigiellan ja čálát dárogillii, de leat guovttegielat. Sáhtášit jođánit čálistit dan seamma sámegilliige.

– Don leat liikká joavdelastimin sosiála mediain, manne vel it bargga juoga mii lea buorrin buohkaide?

Ii áiggošii hárdit

NRK jearrá Maret Laila Antis iigo bala hárdimis olbmuid dieinna čállosiin.

– Ulbmil ii livčče gal hárdit, muhto movttiidahttit ja veahá njeaidit daid negatiivva guottuid ja baluid mat leat sámegiela geavaheamis sosiála mediain. Muhto giella lea dieđusge rašis ášši mii jođánit bohciidahttá dovdduid, fástida.

– Lávetgo njuolga eaŋkilolbmuide maiddái dieid dadjat ja gažadit?

– In dan gal láve. Dalle gal šaddá olmmoš nie mo mun čálán – giellapolitiija mas eai leat sosiála attáldagat, fástida Maret Laila Anti loahpas mojunjálmmiin.

Ii leat vuosttaš geardde ahte giellaberošteaddji ávžžuha sámegillii čállit sosiála mediain.