Anne Risten Gaino Sara (28) lei ieš 6 mánnosaš go eatnis mielde lei vuohččan ealgabivddus. Dan rájes lea áŋgiris ealgabivdi leamaš.

– Mu eadni válddii mu vuohččan mielde ealgabivdui go ledjen 6 mánnosaš, muitala son.

Dál oažžu su nieiddaš seammá mánnávuođa vásáhusaid, go ealgabivdu álggii mannan vahkku, de lei su 5-mánnosaš nieiddaš fárus.

– Munnje goit lei hui dehálaš, in eahpidan galgá go mánná mielde ealgabivdui.

Dehálaš oahppu mánnái

Čakčamánu vuorddašit olu bivdit, go besset meahcástallat ja olbmáiguin beassá leahkit fárrolaga luonddus.

Anne Ristenii lea dehálaš ahte su mánná maiddái oahpásmuva dása.

– Mun háliidan ahte mu mánná maiddái galgá oahppat ealgabivddu ja sávvamis son maid joatká dainna go son stuorru.

Mo manná meahcis go unna mánáš lea mielde?

– Dat gal lea eambbo hástalus vuolgit bivdui, muhto dat manná bures. It sáhte lihka guhká bivdit, čilge Anne Risten.

– Mun jahkán ahte lean čájehan dán vahkkoloahpa ahte manná bures mánáin bivddus, ealga gal gahččá dan dihte ge.

Njeiddii ealgamiesi

Ii leat veadjemeahttun njeaidit ealgga, vaikko smávvamánáš lea salas ealgabivddus, dasa lea Anne Risten ovdamearkan. Vuosttaš ealgga njeiddii bivddu álggus.

– Dat lei máilmme somá, eat lean háhppehan bivdit eará go moadde diimmu. Dat lei buorre bivdobeaivi.