Det er konkursstatistikken til Bisnode Dun Bradstreet som viser auken. Dette er første månad med auke etter at koronaen trefte næringslivet, viser tala frå data- og analyseselskapet.
– Konkursane har lenge vore på eit kunstig lågt nivå, seier kredittøkonom Per Einar Ruud i Bisnode.
Han meiner støtteordningane har fungert bra, men at moglegheitene for stadige utsetjingar av skatte- og avgiftsinnbetalingar eigentleg berre skyv konkursane framover i tid.
– Med konkursauke i april, og mange bedrifter som så skal betale to- og tredoble skatte- og avgiftsrekningar og dessutan feriepengar om ikkje lenge, vil nok konkurstala ganske sikkert auke vidare, seier Ruud.
Stor auke i bygg og anlegg
Bygg- og anleggsbransjen, som normalt står for rundt ein av fire konkursar, har hatt færre konkursar gjennom koronakrisa – fram til no. I april var auken på 61 prosent.
Betre tal er det derimot for hotell- og restaurantbedriftene, som trass nedstengingar og skjenkjeforbod i stor grad klart seg bra. I april var det ein nedgang på 39,6 prosent i konkursar og tvangsavviklingar.
Også innan detaljhandel har det vore nedgang, 18,8 prosent i april.
Oslo og Viken dreg konkurstala opp
Alle fylke har nedgang i konkurstala, med unntak av storfylka Viken og Oslo.
Viken har hatt ein oppgang i konkursar og tvangsavviklingar med 28,2 prosent i april, medan Oslo har ein auke på heile 74,1 prosent.
Størst nedgang har Troms og Finnmark med 71,4 prosent.
