Listhaug om pendlarbustad-sakene: – Uakseptabelt av direktøren å seia at dette ikkje fekk etterspel

– Det er heilt naudsynt at vi får rydda opp i dette her. Eg trur mange der ute spør seg om det er ein ukultur på Stortinget, seier Frp-leiar Sylvi Listhaug.

Administrasjonen på Stortinget har fått krass kritikk for handteringa si av pendlarbustad-sakene.

Listhaug har i dag sendt brev til stortingsdirektøren der ho krev svar på ei rekkje spørsmål.

– Eg har motteke brevet frå Sylvi Listhaug og vil svara så raskt eg kan, seier stortingsdirektør Marianne Andreassen til NRK måndag.

Politiet skal etterforska sakene

Torsdag kveld gav statsadvokaten Oslo-politiet ordre om å etterforska dei såkalla «pendlarsakene».

– Gjennom media har det i løpet av hausten kome fram minst seks namngitte stortingsrepresentantar sin moglege feilpraktisering av nemnde regelverk. Fleire av dei folkevalde har også uttalt seg i media, skreiv statsadvokat Lars Erik Alfheim i etterforskingsordren.

• LES OGSÅ: Dette er pendlarbustad-sakene

Minutt etter statsadvokaten og Oslo-politiet stadfesta politietterforsking av pendlarbustad-sakene, stadfesta stortingspresidenten Eva Kristin Hansen (Ap) at ho trekkjer seg frå stillinga si.

Sylvi Listhaug meiner at politietterforskinga av sakene ikkje er nok.

– Då er det viktig at vi også ser på administrasjonen og rolla deira i dette her for at vi har tillit også til det oppryddingsarbeidet som no må til, seier ho.

– Uakseptabelt

Frp si stortingsgruppe vil no vita kva slags vurderingar som blei gjort då administrasjonen ikkje ville undersøkja Stortingspresidenten si pendlarbustad-sak, fordi fleire representantar hadde misforstått reglane.

– Vi meiner det var uakseptabelt av direktøren å vera så raskt ute med å seia at dette ikkje fekk etterspel når vi veit kor resolutt og strenge reaksjonar ein får om ein bryt andre typar offentlege lover og reglar, seier Listhaug.

I eit intervju med NRK før helga sa stortingsdirektør Marianne Andreassen at ho hadde forvalta dei reglane som gjeld for dei som er folkevalde i nasjonalforsamlinga.

– Vi har eit viktig demokratisk prinsipp med likskap for lova. Eg har her på Stortinget halde meg til det regelverket som er på Stortinget, sa ho.

Dette er regelverket Hansen og dei andre på Stortinget må halde seg til

Reglane slår klart fast at det skal vere minst 40 kilometer heim om du skal ha krav på leilegheit.