Dette er pendlarbustad-sakene

Statsadvokaten har gitt Oslo-politiet ordre om å etterforske dei såkalla «pendlarsakene».

Foreløpig har ingen blitt sikta eller fått status som mistenkt.

Oslo-politiet og statsadvokaten stadfesta politietterforskinga av fleire pendlarsaker torsdag kveld. Minuttet etter stadfesta stortingspresident Eva Kristin Hansen (Ap) ho trekker seg frå stillinga si.

– Gjennom media har det i løpet av hausten kome fram minst seks namngitte stortingsrepresentantar sin moglege feilpraktisering av nemnde regelverk. Fleire av dei folkevalde har også uttalt seg i media, skriv statsadvokat Lars Erik Alfheim i etterforskingsordren.

Fleire medium har omtalt stortingspolitikarar som kan ha feilpraktisert regelverket knytt til pendlarbustadar. Sakene har ulik alvorsgrad. Kva etterforskinga vil vise står att å sjå.

I denne artikkelen blir sakene lista opp. Det betyr ikkje at desse sakene er eller kjem under etterforsking.

Alfheim påpeiker overfor NRK at Oslo politidistrikt står fritt til å velje ut kva for nokre saker som skal etterforskast.

Dette er regelverket Hansen og dei andre på Stortinget må halde seg til

Reglane slår klart fast at det skal vere minst 40 kilometer heim om du skal ha krav på leilegheit.

Kjell Ingolf Ropstad (KrF)

5. september avslørte Aftenposten at KrF-leiar og barne- og familieminister Kjell Ingolf Ropstad hadde budd gratis i pendlarbustadar i Oslo. Han hadde folkeregistrert adresse hos foreldra i Agder frå 2009 til november 2020. Samstundes har han eigd og leigd ut halvpart av ein tomannsbustad på Lillestrøm.

Ropstad gjekk av som statsråd og partileiar 18. september, etter at det blei kjent at han også hadde fått tilgang til ein gratis statsrådsbustad utan å betale skatt av fordelen.

Sveinung Rotevatn (V)

Etter saka om Kjell Ingolf Ropstad, kartla Aftenposten statsrådane sin bruk av pendlarbustadar. Dei kunne 7. september opplyse at dåverande klima- og miljøvernminister Sveinung Rotevatn (V) fekk gratis stortingsleilegheit samtidig som han var folkeregistrert heime hos foreldra.

Då han i 2013 kom inn på Stortinget som fjerdekandidat frå Sogn og Fjordane, flytta han frå eit kollektiv i Oslo og inn i ein pendlarbustad. I heile stortingsperioden frå 2013 til 2017 var han folkeregistrert heime hos foreldra i Eid kommune. Rotevatn hadde dermed ikkje nokon bustadutgifter på fire år.

Tellef Inge Mørland (Ap)

Arbeidarpartiets Tellef Inge Mørland fekk innvilga pendlarbustad då han blei stemt inn på Stortinget i 2017. Han opplyste ikkje om at han då eigde leilegheit i Oslo frå før, og søkte om pendlarbustad fordi han jamleg pendla til Arendal, avslørte Aftenposten 7. september. Han leigde ut leilegheita si og flytta inn i stortingsbustaden.

– Eg las regelverket og gjorde det eg blei bedd om då eg søkte. Eg svarte på alt dei bad meg om, sa Mørland til NRK.

Torgeir Knag Fylkesnes (SV)

Aftenposten kunne 9. september opplyse at Stortinget betalte for at SV sin nestleiar Torgeir Knag Fylkesnes kunne bu i Oslo sentrum, samstundes som han leigde ut leilegheita si i hovudstaden.

Fylkesnes har vore valt inn på Stortinget frå Troms sidan 2013. Han er folkeregistrert og bur i Tromsø. Samstundes har han eigd ei leilegheit i Gamlebyen i Oslo sidan 2010. Den leilegheita har han leigd ut, og fekk innvilga pendlarbustad fordi han hadde leigetakarar der.

Tore Storehaug (KrF)

KrF sin finanstopp Tore Storehaug var folkeregistrert hos foreldra sine på Vestlandet samtidig som han fekk pendlarbustad i Oslo. Han betalte ikkje leige og hadde ingen utgifter i samband med bustaden, skriv Aftenposten 9. oktober.

Politikarar som bur gratis heime skal betale skatt av fordelen av pendlarbustad, ifølge Skatteetaten. Storehaug seier han har følgt informasjonen han har fått frå Stortinget.

Olemic Thommessen (H)

10. september avdekte Aftenposten at Høgre-politikar Olemic Thommessen kjøpte ei leilegheit i Oslo, samtidig som han hadde gratis pendlarbustad. Thommesen fortalde at han aldri informerte om den nye leilegheita, då han ikkje såg på det som relevant informasjon til Stortinget.

Seinare kunne avisa fortelje at Thommesen i fleire år lèt sin 29 år gamle son bruke stortingsleilegheita som studenthybel. Sjølv pendla han til Lillehammer.

Kristian Tonning Riise (H)

Stortingsrepresentanten frå Høgre, Kristian Tonning Riise, var folkeregistrert på guterommet heime i Hedmark då han blei valt inn på Stortinget i 2017. Han fekk innvilga pendlarbustad den hausten. Riise opplyste ikkje om at han allereie budde i Oslo, der han saman med to andre eigde ei leilegheit.

Riise stadfesta til Aftenposten 30. september at han haldt fram med å bu i leilegheita i halvannan år, samtidig som stortingsleilegheita stod tom. Dette trass i at stortingspendlarar årleg må stadfeste til Stortinget at dei sjølv bur i leilegheita.

Himanshu Gulati (Frp)

Himanshu Gulati eigde fire leilegheiter i Oslo og likevel fekk gratis pendlarbustad. Årsaka var at han hadde kjøpt seg leilegheit på Jessheim, som var meir enn 40 kilometer unna. Då var han kvalifisert til pendlarbustad.

Til Dagens Næringsliv avviser Gulati i 2019 at han kjøpte leilegheita på Jessheim for å få gratis pendlarbustad. Han erkjenner likevel at den ikkje blir brukt mykje, mellom anna på grunn av mykje reiseverksemd. Aftenposten skreiv 6. oktober at Gulati har valt å ikkje søke om pendlarbustad denne stortingsperioden.

Eva Kristin Hansen (Ap)

Tysdag avslørte Adresseavisen at stortingspresident Eva Kristin Hansen hadde hatt pendlarleilegheit, samtidig som ho frå 2014 eigde bustad saman med ektemannen sin i Ski. I køyrelengde var dette berre 29 kilometer unna Oslo, men Hansen var folkeregistrert i Trondheim. Først i 2017 endra ho adresse til Ski og sa opp pendlarleilegheita.

Torsdag kveld trekte Hansen seg frå vervet som stortingspresident etter at det blei kjent at Oslo-politiet hadde opna etterforsking av pendlarbustad-sakene.

– Eg meiner det er uhaldbart for Stortinget å ha ein stortingspresident som er under politietterforsking, sa Hansen.

Hansen trekker seg som stortingspresident

Stortingspresident Eva Kristin Hansen (Ap) trekker seg etter det ble kjent at politiet vil etterforske pendlerbolig-sakene.