Etter at nyheita om at den tidlegare langrennsløparen Vibeke Skofterud hadde mista livet i ei ulukke, har kondolansane strøyma inn på sosiale medium.
Blant dei som har lagt ut minneord er kulturminister Trine Skei Grande som heidrar Skofterud for å ha bidrege til både OL- og VM-gull i stafett. Ho skriv også at det er meiningslaust når eit så ungt menneske blir borte.
Ap-leiar Jonas Gahr Støre skriv at han vil hugse henne for hyggelege møter på tur i Marka og for dei modige vala ho tok.
Også den britiske ambassaden i Noreg har sendt kondolansar.
Ekspertkommentator under OL
Under vinter-OL i Pyeongchang i Sør-Korea tidlegare i år, var Skofterud med som ekspertkommentator for Discovery Network, som blant anna eig kanalane TVNorge, Max og Eurosport. Kommentator i Discovery, Kenneth Fredheim, er også ein av dei som minnest sin tidlegare kollega.
I 2016 kom Vibeke Skofterud på tredjeplass i NRK-programmet «Mesternes Mester», der tidlegare idrettsutøvarar konkurrerer mot kvarandre.
Blant deltakarane som konkurrerte mot Skofterud i Monaco det året, var tidlegare fotballspelar Jan Åge Fjørtoft. Han skriv at Skofterud var ei tøff og varm jente som aldri vil bli gløymd.
Møtte mange
Vibeke Skofterud var også ein viktig ambassadør for langrennssporten utanfor sporet. Mange av dei som har møtt henne eller har fått treningstips frå henne, hugsar henne som varm, blid og omtenksam.
Ein av dei er komikaren Nils-Ingar Aadne, som satsa på langrenn då han ville sjå kor sprek det gjekk an å bli på eit år.
Også artisten Hans-Erik Dyvik Husby minnest Skofterud som ein person med eit hjarte av gull.
Vibeke Skofterud gjorde også sterkt inntrykk på dei som aldri møtte henne. På nettet er det mange som skriv kva ho betydde for dei.