Tom Cruise dukka opp på jobben til Bergit: – Det var heilt fantastisk

Det var sist veke at Tom Cruise kom til Longyearbyen Svalbard i samband med innspelinga av den åttande Mission Impossible-filmen.

Og skodespelaren oppheld seg framleis på den arktiske øygruppa.

For det som starta som ein vanleg dag på jobb for Bergit Svenning frå Dalselv i Nordland, enda med litt ekstra spenning då Hollywood-stjerna dukka opp.

– Det var eigentleg heilt fantastisk. Han er ein kjempehyggeleg fyr, seier ho.

Svenning jobbar på bakkestasjonen Svalsat på Platåfjellet. Der har ho vore sidan november i fjor, men denne måndagen kjem ho neppe til å gløyme med det same.

– Han var blid, smilte og prata med alle.

– Han er kjempekjekk

Svenning fortel at skodespelaren fekk ei omvising på stasjonen, og at han tok turen innom nesten kvart einaste kontor og helsa på alle.

– Han fortalde at han var veldig nøgd. Han syns staden var heilt «amazing».

Stasjonen er verdas nordlegaste og største mottak av signal frå satellittar, og ifølge Svenning tek dei i mot signal frå 10.000 satellittar som snurrar rundt i verdsrommet.

– Kva snakka de om?

– Vi snakka om vêr, vind, vinter og alt det ein gjer på Svalbard. Og om han hadde sett isbjørn.

Det hadde han altså ikkje enno, ifølge Svenning.

Og når ei smørblid Hollywood-stjerne dukkar opp på jobb, må ein jo sjølvsagt ha eit bilete ein kan vise til venninnene sine.

– Det var ingen problem å få tatt eit bilete. Men akkurat då han snudde seg, tok rundt meg og såg inne i auga mine, så kjente eg at eg plutseleg vart 16 år, ler Svenning og legger til:

– Han er faktisk kjempekjekk.

Det var Rana No som skeiv om besøket først.

– Ikkje ønskeleg med denne type aktivitet

Innspelinga i Longyearbyen skal vere i samband med «Mission: Impossible – Dead Reckoning Part Two», som er den åttande filmen i serien.

Scener frå den første delen av filmen vart også spelt i Noreg.

I byrjinga av mars vart det kjent at produksjonsselskapet PolarX vart nekta å lande med helikopter på Svalbard i samband med filminnspelinga.

PolarX søkte om rundt 40 landingsløyve for filming og luftfilming av menneske og landskap. Selskapet sende vidare ei klage på avslaget til Miljødirektoratet, for så å trekke den tilbake seinare.

For å få lov til å flyge på Svalbard, må selskapa også få løyve frå Luftfartstilsynet. Det har dei heller ikkje fått.

– Dette er både fordi operatøren ikkje når dei tekniske krava til slike operasjonar, og at det ikkje er ønskjeleg med denne typen aktivitet i eit sårbart naturområde.

Det skreiv Håvard Vikheim, direktør for kommunikasjon og samfunnskontakt i Luftfartstilsynet, i ein e-post til NRK sist veke.