Maria og Marcus gifter seg på valentinsdagen: – Orkar ikkje stresset

Drop-in legetime, drop-in dekkskift, eller drop-in frisørtime?

Det finst allereie ein heil masse drop-in-tilbod.

Men drop-in bryllaup – det er kanskje ikkje like kjent for alle.

– Vi orkar ikkje alt stresset, difor fungerer det godt for oss, seier Maria Bingen og Marcus Furubråten som er eit av para som har drop-in bryllaup på Valentinsdagen.

Og stadig fleire tenker som dei. Dei siste to åra har 64 personar gifta seg i nettopp drop-in bryllaup ifølge den norske kyrkje.

• Ikkje alle tenkjer på at bryllaup skal vere enkelt og billig. Har du tenkt til å gifte deg på Lofotens mest berømte fjell kan det til dømes bli «svindyrt».

– Orkar ikkje alt stresset

Onsdag 14. februar er ein heilt vanleg dag for dei aller fleste.

Det er det òg for Maria Inez Alvarez Bingen og Marcus Furubråten i Romerike.

– Eg skal ein tur til legen på morgonen. Marcus skal på jobb som bilmekanikar, før han drar heim og tar på seg dress, fortel Maria.

Men etter det blir det alt anna enn ein vanleg dag. Det er bryllaupsdagen deira.

26-åringane fortel at dei eigentleg tenkte å gifte seg i rådhuset.

Men då dei kom over tilbodet om drop-in-bryllaup i kyrkja passa det perfekt.

– Ingen av oss er interessert i å bruke så mykje pengar på eit bryllaup, seier Maria.

– Det er som å booke time hos tannlegen eller på verkstad. I tillegg er det rimelegare og folk kan berre slenge seg med, seier Marcus.

Men sjølv om drop-in har noko trivielt over seg, trur Marcus at han vil kjenne alvoret.

– Eg trur ikkje nervane kjem før eg køyrer opp bakken til kyrkja på onsdag.

• Det var nok nervar i sving også i bryllaupet til Ina og Jani. Dei sette til og med verdsrekord i sitt bryllaup.

Den norske kyrkje

Og paret frå Nes er ikkje dei einaste som nyttar seg av drop-in-tilbodet til den norske kyrkje.

Jan Kristian Kielland, avdelingsdirektør i Kirkerådet, fortel at slike bryllaup har blitt meir populært dei siste åra.

– Vårt inntrykk er at mange opplever dette som eit fint lågterskel alternativ til å gjere noko ein har tenkt på ein stund, seier han.

Fleire fortel dei at det er frigjerande å sleppe store kostnadar og mykje planlegging.

Ingen veit heilt kven som kom på ideen med drop-in bryllaup først, fortel Kielland.

– Men det er ikkje eit initiativ frå toppen. Det er litt kyrkjeleg innovasjon frå grasrota, kan du seie.

Første gong dei talte opp, i 2022, gifta 30 par seg på denne måten. Året etter var det 34 par. I år blir det arrangert i 14 kyrkjer.

Men det er ikkje den einaste datoen folk kan gifte seg drop-in i år. Det er 10 andre arrangement utover året.

Om du synest spesielle datoar er artig, blir du sikkert ikkje overraska over å høyre at dei mest populære drop-in-datoane er 24.04.24 og 24.02.24.

I tillegg skal fleire gifte seg på skotårsdagen, 29.02.24.

59 år gamle Steinar Fredriksen og 69 år gamle Ole Johan Larsen frå Sørfold i Nordland er to av dei.

– Når aldri gullbryllaup eller sølvbryllaup

– Det er kjempepraktisk, for ein treng berre å hugse på dagen kvart fjerde år.

Det seier Steinar Fredriksen. Han og kjærasten, Ole Johan har vore saman i 13 år. Det skal dei ferie den siste dagen i februar.

– Vi når nok aldri verken gullbryllaup eller sølvbryllaup. Men kvart fjerde år skal vi feire ordentleg, seier han.

Det er ikkje berre datoen som er spesiell med bryllaupet til Steinar og Ole Johan.

Bryllaupet blir nemleg historisk. Det er det første likekjønna bryllaupet i Sørfold i kommune.

Ole Johan og Steinar dei er ikkje dei einaste. Heile sju par skal gifte seg den dagen.

– Det blir litt samleband, men det trur eg blir veldig greitt, seier Fredriksen.

I motsetnad til paret på Nes, gjer Ole Johan og Steinar litt meir ut av dagen. Festen som eigentleg skulle vore liten, blir no til ein feiring med 30 gjestar.

Steinar har fri frå jobben som helsesjukepleiar både før og etter.

– Det er litt større konsekvensar enn å kleppe håret, sjølv om det er drop-in, seier sokneprest i Sørfold, Lisbeth Torsvik Giselmann.

I fjor hadde dei drop-in dåp i kyrkja, fordi det var mange barn født under pandemien som ikkje var blitt døypt.

– Det var så vellykka at vi tenkte at vi kunne ha bryllaup òg, seier kyrkjetenar Beate Breivik.

Men namnet bedrar litt. Sjølv om det er drop-in er det ikkje berre å kome for å gifte seg på dagen.

Først må ein melde frå til skatteetaten og få ein prøvingsattest.

Soknepresten fortel at nokre av para som kjem for å gifte seg i år har vore sambuarar i 40 år.

– Her kan dei gifte seg utan blautkakekjole og stor feiring. Det blir ei ramme rundt som er noko anna rundt enn i rådhuset, seier Giselmann.