Etter at det i førre veke vart klart at hovudtrenar i Molde Tor Ole Skullerud trekk seg etter sesongen, har mange supporterar starta å håpe på ein Solskjær-retur.
– Storparten gjer nok det. Det er vel sikkert nokon som ikkje er samde, men dei fleste eg har høyrd vil ha Ole Gunnar tilbake. Seier nestleiar i Tornekrattet, Stefan Sætre.
Tidlegare Molde-spelar, Stein Olav Hestad, vil gjerne ha Solskjær tilbake. Han trur at Solskjær kan bli førstevalet for klubben.
– Dersom han hadde kome tilbake med den gjengen han hadde førre gong, Mark og Richard, hadde det sjølvsagt vore førsteprioriteten til Molde.
Klubbleiinga
Spørsmålet er om forholdet mellom Solskjær og klubbleiinga kan sette ein stoppar for eit eventuelt comeback. Knut Olav Lillebakk stod i mål då Solskjær var Molde trenar, og har sidan det følgt Molde som journalist i Romsdals Budstikke. Han trur det er fult mogleg for Solskjær å komme tilbake som trenar i ein ny periode.
– Slik eg har skjønt det, var det litt gnissingar og usemje her og der. Men eg trur ikkje det er så gale at samarbeidet ikkje kan takast opp att.
Hjå sine gamle elevar som var spelarar då Solskjær tok to seriegull med Molde, er suksesstrenaren iallfall velkommen.
– Vi får sjå om det er mogleg at han kjem tilbake, og om leiinga vil det. Som sagt synest eg han er ein god trenar, og vi har gode relasjonar. Så dersom han er motivert til å komme tilbake, er det klart at det hadde vore bra, seier Moldes kaptein Daniel Berg Hestad.