Kommune må betale millionerstatning til tre sysken

«Anken fra Ulstein kommune tillates ikke fremmet» er konklusjonen frå Høgsterett. Dermed er det sett punktum for ein årelang rettsstrid.

Dette betyr at Ulstein kommune må betale 6,6 millionar i erstatning til tre sysken som blei mishandla av far sin då dei var små, slik lagmannsretten bestemte tidlegare i år.

– Glad og letta

Syskenflokken har i årevis hevda at kommunen visste om mishandlinga og burde ha gripe inn.

– Anken frå kommunen er nekta fremja, og våre klientar får endeleg utbetalt erstatninga si. Det er ein gledas dag. Alle fem har fått millionerstatning, skriv advokaten til syskenflokken, Mette Yvonne Larsen.

Kollegaen hennar, Tonje Lilaas Larsen, seier at ho så langt berre har fått tak i Margareth Øvrelid.

– Ho er veldig letta og glad for at det no blir sett punktum i saka.

– Overraskande

Kommunestyret bestemte seg tidlegare i år for å anke, men Høgsterett vil altså ikkje ta inn ankesaka:

«Utvalget finner samrøystes at det ikke er grunn til å oppheve lagmannsrettens dom i utvalget etter tvisteloven § 30–3 andre ledd, og at verken avgjørelsens betydning utenfor den foreliggende sak eller andre forhold tilsier at saka blir fremmet for Høyesterett, jf. tvisteloven § 30-4.»

– Det er overraskande, seier kommunen sin advokat Terje Marthinsen.

Han seier at ein samla forsikringsbransje og heile Kommune-Noreg sto bak anken, og at dei ikkje er glad for konklusjonen til Høgsterett.

– Det fører då dessverre til at trenden med denne typen søksmål vil halde fram, og vi står då i ein situasjon der vi ikkje veit kva for jus som blir lagt til grunn av domstolane. Det er leit for alle, ikkje minst for dei som lurer på om dei kan ha eit krav mot ein kommune. Og det er trist.

I avgjerda frå Høgsterett kjem det også fram at Høgsterett avviser dei tre organisasjonane som ønskte å vere partshjelparar i ei eventuell sak.

Det var Trafikkforsikringsforeningen (TFF), Yrkesskadeforsikringsforeningen (YFF) og KS – Kommunesektorens Organisasjon.

– Bra med eit punktum

– Vi meiner at slike saker må bli behandla av rettsvesenet, likt over heile landet. Det viktigaste for oss var å få ei snarleg avklaring i ankespørsmålet, sa ordførar Stian Skorgen Scheide (H) tidlegare i år.

I ei pressemelding skreiv kommunen då at dei hadde fått klare tilrådingar frå forsikringsselskapet og advokaten til kommunen om å anke.

Etter avgjerda frå Høgsterett seier Skorgen Scheide følgande:

– Eg registrerer det Høgsterett no har sagt og det respekterer vi fullt ut. No har vi fått ein rettskraftig dom, seier han.

– Det viktigaste er at det har vore ein lang og vanskeleg prosess. Spesielt for søskena som har stått i dette i åtte år. Det er bra at ein no har fått eit punktum, legg han til.

Vaks opp med valdeleg far

Barndommen var eit mareritt for syskenflokken på fem. Dei vaks opp på Sunnmøre på 50- og 60-talet med ein valdeleg far som plaga dei fysisk og psykisk. Sjølv om «alle» visste kva som gjekk føre seg, opplevde dei at ingen vaksne greip inn.

Dei to yngste fekk litt over 4 millionar kroner i fjor vår. I tillegg måtte kommunen betale alle utgifter til rettssakene for dei.

No er det også sett punktum for dei tre eldste.