Turistvegen Trollstigen opnar – men kokkemangel skapar fortviling

Den populære turistvegen Trollstigen i Møre og Romdal som er kjend for dei krappe hårnålssvingane, opna endeleg på fredag. Det store snøfallet i april gjorde ryddinga av vegen utfordrande og dryg også i år.

Nils Hoel frå Isfjorden var den første som fekk køyre over Trollstigen i år. Han trur mange vil gjere det same.

– Det er ei oppleving, det er berre å sjå på naturen og det fine vêret. Eg reknar med at halve Noreg kjem hit i løpet av sommaren, seier Hoel.

Manglar kokkar

Edmund Meyer driv serveringsstadene og buene på toppen av fjellplatået. Han gler seg stort over å endeleg kunne opne, men ser med stor usikkerheit på korleis årets sesong blir.

– Det er utfordrande. Akkurat no har vi ikkje fått inn kokkane enno, så vi startar forsiktig, men vi håpar styresmaktene skjønnar at vi må ha nokon til å lage varmmat, seier Meyer.

Han har fem kokkar som ventar på å få kome inn til Noreg, men som ikkje har fått løyve til å kome. Nav har skaffa dei umiddelbart personale, men kokkar fekk dei ikkje tak i.

– Viss dei ikkje kjem inn så blir det lite for oss å gjere i haust, seier Meyer.

Står i fare for å legge ned

I Valldalen kunne serveringsstaden Jordbærstova no stått klare for å ta imot bilistar og motorsyklistar på veg ned frå Trollstigen.

Men det går ikkje utan dei tre polske kokkane deira, og dermed må dei framleis halde stengd.

Dei har alt søkt, men fått avslag fordi kokkane ikkje er samfunnskritiske. No søker sunnmøringane igjen, og grunngjev med at dei er næringskritiske.

– Viss vi ikkje får tak i verken norske kokkar eller dei polske, må vi vurdere å halde stengt vidare. Vi kan ikkje tilsette folk for å berre selje vaflar, det er ikkje berekraftig her, seier Åse Erstad.

Dermed vil dei fem servitørane deira truleg miste jobben.

– Eg synest det er veldig vanskeleg. Å legge ned drifta eit år trur eg er veldig negativt, seier Erstad.

I fjor hadde dei enormt med gjester, men då fekk dei polske kokkane sleppe inn. Å få norske kokkar berre for ein sommarsesong er også vanskeleg.

Dei har gjort utleigebustaden deira om til karantenebustad og fått den godkjend av arbeidstilsynet. Alle papir er i orden, ifølge Erstad, som berre manglar eit ja frå Sjøfartsdirektoratet.

– Eg er evig optimist, så eg håpar det går i orden. Får vi eit nytt nei, så søker vi igjen.

18 tonn kalk skal opne vegen tidlegare

Vegen til Geiranger blir opna med eit eldgamalt triks.