Det var klokka 11.45 at politiet først meldte om ein traktorvelt på Tustna i Aure kommune på Nordmøre. Alle naudetatane rykka ut til ulykka.
Klokka 12.20 hadde politiet akkurat kome til staden og klokka 12.45 var også luftambulansen på plass. Mannen blei så frakta til St. Olavs hospital i Trondheim for vidare behandling.
– Skadeomfang er så langt ukjent, men det kan vere snakk om alvorleg personskade, seier Sindre Molnes, operasjonsleiar i politiet.
Føraren av traktoren skal ha vore bevisst etter ulykka.
Rulla over personen
Ifølge politiet skal traktoren ha rulla over mannen. Det var pårørande som meldte frå om ulykka.
Politiet har gjennomført åstadundersøkingar på staden i dialog med kriminalteknikarar. Desse blei avslutta i 14.00-tida, fortel Molnes. Saka blir etterforska av politiet.
Ulykkesgruppa til Statens vegvesen er også varsla om ulykka.
