Alle snakkar om berekraftig utvikling i verdsarvområda i Geiranger og Nærøyfjorden. Alt tyder på at rekninga hamnar hos turistane.
Det er stor bil- og busstrafikk på dei kronglete, verdskjende vegane til og frå Geiranger. No kjem kravet om at turistane må bidra med kroner og øre.
På konferansen Grøn Fjord i Geiranger snakkar dei om cruiseskipa som skal gå mot nullutslepp i løpet av få år. Finansieringa av reiselivet er også eit viktig tema.
Gjenkjenning av bilnummer
Fellesgodefinansiering heiter det på turistnæringa sitt eige språk. I verdsarvstadene Flåm og Geiranger krev fleire reiselivsaktørar at dei tilreisande skal betale meir. Dei vil ha i gang ei prøveordning der gjenkjenning av bilnummer er ein del av opplegget.
– Teknologi med skiltlesing er noko vi vurderer sterkt å ta i bruk, seier Ståle Brandshaug, reiselivsdirektør i Visit Sognefjord. Målet til reiselivsnæringa er at alle skal betale – uansett om dei kjem med bil, buss, ferje eller cruiseskip.
Vil ha prøveprosjekt
Både i Geiranger og i Flåm håper dei at det kan vere politisk vilje til å satse på dette. I første omgang vil dei ha eit prøveprosjekt nokre få stader. På sikt kan det bli likt over heile landet.
Ståle Brandshaug i Visit Sognefjord seier at gjestane må betale for dei goda dei får når dei er på besøk i Noreg. I Flåm har dei tre hundre innbyggarar, og ein million besøkande i året.
– Når trafikkstraumen er så stor, må vi ha eit større inntektsgrunnlag. Små kommunar og bedrifter kan ikkje lenger ta ansvaret for toalett, søppel og parkering, seier Brandshaug.
I Geiranger har både turistnæringa, innbyggarane og kommunen bede om få innføre turistskatt i mange år.
– Er vande til å betale
– Vi har god tru på det opplegget som no blir skissert; seier Katrin Blomvik Bakken. Ho er prosjektleiar for Grøn Fjord-konferansen i Geiranger.
– Men vil ikkje dette verke negativt for dei som vurderer å reise hit?
– Ingen blir skremde av dette. Turistskatt er eit kjent fenomen internasjonalt. Dette er noko dei fleste turistane er villige til å betale, seier Katrin Blomvik Bakken.
- Les også: Do-trøbbel i Geiranger
Verdsarvområda i Geiranger og Flåm skal kome med ein uttale i løpet av ein månad. Då blir det opp til politikarane og styresmaktene om dei vil opne for ei prøveordning der turistane betaler.
Ståle Brandshaug i Visit Sognefjord ser gjerne at ordninga er på plass allereie neste sommar.
– Vi håper dette kan skje så raskt som mogleg. Vi kan ikkje halde fram som i dag, der små aktørar ordnar sanitærforhold og parkering utan å ha noko igjen for det.