Både kona og sonen blei køyrde til legevakta ved Molde sjukehus fredag ettermiddag, etter at faren i huset skal ha gått laus på dei. Politiet fekk melding om situasjonen klokka 15.31.
– Han er sikta for vald i nære relasjonar. Mor og son blei tatt med til sjukehus med ambulanse, dei var ikkje alvorleg skadde, men mor hadde sår som det blødde frå, seier operasjonsleiar Leif Bergem-Ohr.
Sonen skal ha blitt biten
Det var kona sjølv som ringde til politiet og varsla, ho skal ha blitt slått med ein vedkubbe. Ein av sønene, ein tenåringsgut, skal ha blitt biten i fingeren av faren. Politiet veit førebels ikkje bakgrunnen for episoden.
– Familievald er det desverre alt for mykje av. Her har det vore ein eskalert situasjon, og om han då har tatt det næraste han har funne er det uråd å svare på, seier Bergem Ohr.
Blir avhøyrde fredag kveld
Fredag ettermiddag er kona og sonen framleis på legevakta, den pågripne mannen sit i arrest ved Molde politistasjon. Politiet har planar om å avhøyre alle tre i løpet av kvelden.