Politiet fekk melding om overfallet, som skal ha skjedd i kvinna sin heim i Volda sentrum, like før klokka 03.00 natt til søndag. Politiet omtalar hendinga som grov kroppskrenking.
– Vi har kriminalteknikarar på staden og etterforskar saka, sa etterforskingsleiar Grete Hjelle ved Møre og Romsdal politidistrikt.
Ifølgje politiet skal det ikkje vere snakk om valdtekt.
Det var Sunnmørsposten som omtalte hendinga først.
Ingen mistenkt
Politiet seier til NRK at dei førebels ikkje har nokon mistenkt i saka.
– Eg har ikkje lyst til å gå ut med meir no, på grunn av omsyn til etterforskinga, sa Hjelle tidleg søndag ettermiddag.
Politiet ber om tips
Seinare søndag ettermiddag melder Hjelle at politiet ynskjer tips og vitneobservasjonar frå folk som har vore i Volda sentrum, nærare bestemt Halkjelsgata, i tidsrommet frå klokka 02.45 til 3.10.
– Politiet er spesielt interessert i tips om ein person som hadde på seg mørk kaps, mørk jakke og lys bukse, seier etterforskingsleiaren.
Tips kan ringast inn til politiet på telefon 02800 / 70118700.
Ifølgje Hjelle er kvinna tatt hand om. Politiet etterforskar den grove kroppskrenkinga breitt og har i ettermiddag blant anna utført taktisk etterforsking og kriminaltekniske undersøkingar.
