Det var klokka 09.10 tysdag at politiet fekk melding om arbeidsulykka. Eit firma med fleire personar arbeidde på ein skogsveg i Halsa, då ulykka skjedde.
– Det vart sett i gang livredding, men livet stod ikkje til å redde. Mannen døydde på staden, seier operasjonsleiar Borge Amdam ved Møre og Romsdal politidistrikt.
Mannen er norsk og kommunen sitt kriseteam er varsla. Amdam seier at hovudfokuset no er å ta hand om dei pårørande på ein god måte.
Politiet prøver å finne ut kva som skjedde og tar avhøyr av vitne. Også Arbeidstilsynet har vore på staden og gjort undersøkingar.
Det er lensmannen som etterforskar saka vidare.
