Spesialrådgjevar Morten Strand i KS trur samfunnet blir meir ope som følgje av innskjerpinga i reglane.
– Me set det veldig høgt at me skal ha eit ope lokalt samfunn, der ein får riktige vedtak utan at ein er part i saka, seier Stram.
Dei nye endringane i forvaltningslova trer i kraft frå første november. Og fører til at politikarar er inhabile om dei sit i kommunale og interkommunale selskap, trass i at dei er fullt ut offentleg eigde.
Morten Strand i KS håper politikarane blir meir medvitne om eventuelle dobbeltroller.
– Ein bør heller prøve å få andre inn i desse styra og sjølv vere representert som eigar.
Bysekretær i Ålesund, Tore Hals, fortel at Ålesund kommune kjem til å setje inhabilitet på sakslista når det no kjem ei lovendring.
– I den folkevaldopplæringa me skal gjennomføra vert inhabilitet eit viktig punkt. Dessutan vil dei bli minna på bystyret sitt vedtak om at alle folkevalde og visse grupper i administrasjonen blir oppmoda om å registrera seg i Styrevervregisteret, seier Hals.
Politikarar kan også etter 01.11.2011 framleis sitje i styra til aksjeselskap og kommunale selskap, men Morten Strand i KS minner om følgjande.
– Viss ein blir part i saka, er ein inhabil i kommunestyret.