Eit nytt gjødselsstystem har som mål å redusere klimagassutsleppa frå landbruket. I staden for å spreie møkka utover markane, skal gjødsla pumpast ned i bakken. Dermed blir utsleppa av ammoniakk halvert.
– Vi får nokre groper der gjødsla blir injisert 5 - 10 cm ned i bakken med 15 centimeters mellomrom, fortel Olav Martin Synnes i Norsk Landbruksrådgiving, Sunnmøre.
Store mengder klimagassar
Landbruket står for 95 prosent av utsleppa av ammoniakk til atmosfæren. Det meste kjem frå husdyrgjødsel. Og no skal bøndene lære om miljøvenleg gjødsling.
– Min ambisjon er at eg skal redusere forbruket av kunstgjødsel med minst femti prosent, seier gardbrukar Odd Christian Stenerud.
Nøgd oppfinnar
Gjødsel-pumpesystemet som i dag vart demonstrert er funne opp på Vigra. For oppfinnaren er det gledeleg at systemet no er tatt i bruk.
– Det er nesten ikkje til å tru. Men bøndene har lukta på forskjellige teknikkar, og bonde Stenerud her har vore gira nok til å ta dette i bruk. Og det er eg veldig glad for, seier oppfinnar Jan Hatlø.
Lukta blir fjerna
Bonden på Godøya slår grset på 15 gardar. Ved å pumpe gjødsla ned i bakken vert også lukta kraftig redusert, til glede både for bonden og andre.
– Ikkje minst når det er fint ver, og vi ser at andre sit og solar seg. Då er det ikkje akkurat oppløftande å køyre rundt og spreie lukt, seier Odd Christian Stenerud.