Sjå på dette. Utdraget er henta frå Yr.no, og vi har tilfeldigvis vald ut Eidsvåg i Romsdal. Her reknar Yr med at det skal bli opp i 15 grader onsdag 3. mai. Men finvêret tek til alt til helga.
Det ser ut til å vere onsdag 3. mai som blir den aller varmaste dagen i vårt distrikt. Fleire stader skal få temperaturar langt over 10 grader. Men temperaturvarselet varierer temmeleg mykje.
– Det er kanskje å ta litt hardt i å kalle dette ein smak av sommar. Men det blir temperaturar opp mot 13 – 14 – 15 grader mange stader. Dei som tek fri i langhelga som kjem gjer veldig lurt i det. Det blir kjempefint ver frå fredag og utover, seier meteorolog Martin Granerød til NRK.
Tysdag morgon låg imidlertid temperaturane i Møre og Romsdal frå minus ein grad til opp i fire plussgrader på målestasjonane som NRK Møre og Romsdal brukar i morgonsendingane sine.
Og det kjem til å halde fram med eit ganske varierande ver også i dag.
– Det er framleis vinterleg. Temperaturane ligg godt ned mot 0 grader. Fleire stader har minusgrader no i morgontimane. Akkurat no er det nordaust bris på kysten. Dermed held dei fleste byene seg ute i havet inn til vidare, seier Granerød.
Men ut på dagen snur vinden. I løpet av dagen kjem vinden frå nord/nordvest. Då kjem byene inn over land igjen.
– Det er ytre strok som kjem til å få mest nedbør. Men sola kjem til å kome fram mellom byene, seier Granerød.