Akebakken ved skulen var i dag mykje fullare enn normalt. Til vanleg går det 96 elevar ved Måndalen skule, men no har elevtalet auka med 40 prosent.
– Det var litt rart at det skulle kome så mange, men eg synest det var kjekt å møte dei, seier Matias Thomasli Bruaset.
Han har allereie prata med nokon av dei og spurt om dei vil bli venner.
– Vi kan lære dei å prate norsk. Og vi kan sikkert lære å prate ukrainsk, trur Bruaset.
Har mange spørsmål
Assistentlærar Yevheniia Boboshko kom til Noreg for snart to år sidan og har lært seg norsk. Ho svarer på alle spørsmåla barna har.
– Eg hjelper dei å forstå kva reglar som gjeld på skulen, seier Boboshko. I dag er det kos med aking og grilling, men så snart dei kjem i gang med normale skuledagar skal dei lære norsk og lære om det norske samfunnet og kulturen. Elevane skal etter kvart bli busette i kommunar rundt om i landet.
– Det er ein kul skule, seier elev Igor Stedsjuk, som likte både akebakken og pølsene.
Noreg planlegg å ta imot og busetje 37.000 flyktningar i 2024.
Fint tilskot for liten skule
I november blei det opna akuttmottak for flyktningar i Rauma med plass til 400 personar.
Sidan den tid har kommunen budd seg på skuletilbodet for barna.
– Vi har hatt relativ kort tid på å rigge opp det heile, men vi har tilsett lærarar, bestilt inn PC-materiell, stolar og bord og organisert busstilbod, seier ordførar Yvonne Wold (SV). Ho seier det er ein stor jobb, men folk har vore positivt innstilt for å få det til.
Det var i Måndalen det var ledige klasserom og dermed var det naturleg å samle alle i ei oppstartsklasse der.
– Om det ikkje er redninga for grendeskulen er det eit fint tilskot, seier Wold.
Bli trygge på skulen
Rektor Ingrid Renberg seier at dei ukrainske elevane skal ha eigne grupper i undervisninga, men dei skal ha friminutt saman med dei norske elevane og også besøke klasserommet deira.
– Hadde elevane blitt buande i kommunen vår, hadde vi nok tenkt annleis, seier Renberg. Ho seier det viktige no er at barna blir kjende med både språket og den norske skulestrukturen.
Men i dag handla det aller første møtet om å gjere elevane trygge og at dei skulle få ein god start.