Både politiet og Hovudredningsaksjonen aksjonerte då det laurdag ettermiddag kom melding om at det var observert eit naudbluss i fjorden utanfor Sula.
Politiet sende ut tre patruljar og Hovudredningssentralen sette inn ein båt i søket etter folk som kunne vere i havsnaud.
Truleg ingen fare
Laurdag ettermiddag konkluderer politiet med at alt tyder på at nokon har leika seg.
– Vi har vore i kontakt med fleire båteigarar som også observerte naudraketten, og som deretter såg ein båt køyre i frå området i høg fart, seier operasjonsleiar Sindre Molnes ved Møre og Romsdal politidistrikt.
Beklagar ressursbruken
Det var ein privatperson som laurdag ettermiddag melde frå at han skal ha sett eit naudbluss i området ved Tørla utanfor Sula. Naudblusset skal etter alt å dømme ha hamna i Borgundfjorden.
Operasjonsleiaren minner om at det er straffbart å skyte opp naudrakettar utan å vere i fare, og seier det binder opp ressursar dei elles ville brukt til andre ting.
– Det er sjølvsagt svært beklageleg at slikt skjer, seier han. Molnes seier dei har fått skildringar av båten, men kan ikkje seie om dei kjem til å etterforske saka vidare.
