Om Kyrkjemøtet seier ja til at homofile kan gifte seg i kyrkja, må biskop Ingeborg Midttømme rette seg etter det.
– Det er mitt ansvar. Eg har ikkje noko val. Eg er forplikta til å følgje ordninga til kyrkja vår, seier ho.
I ytste konsekvens
Onsdag kom det fram at biskopen har trekt seg frå Presteforeininga i protest mot vedtaket om innføring av liturgi å vie homofile par. Midtømme seier det ikkje var noko enkelt val.
– Å oppleve at ein så tung organisasjon, som presteforeininga er, einstemmig seier noko som ikkje er dekkande for det eg står for, det syntest eg var ubehageleg.
- Les også:
- Les også:
– Det er mange ting som kan bryte på djupt vatn, eige liv og tru. Men lojaliteten min ligg alltid mot ordinasjonen og løfta eg har avlagt. I ytste konsekvens må eg gå ein ny runde med meg sjølv. Det kan vere at dette er så alvorleg for meg at eg ikkje lenger kan vere i den posisjonen eg er i.
Kjempar vidare
Biskopen var leiar for Presteforeininga i fleire år. Etter ein tenkepause melde ho seg ut av foreininga i protest mot korleis spørsmålet har blitt behandla.
– Det som vert feil i denne saka er at foreininga konkluderer utan at det er forankra i medlemsmassen. Eg trur at presteforeininga ikkje innsåg konsekvensane av vedtaket sitt og dei sterke reaksjonane som ville kome, seier ho.
Ho vel å ta kampen mot at homofile skal kunne gifte seg i kyrkja utanfor presteforeininga, og legg til at ho ikkje er den einaste.
– Eg har fått fleire meldingar av prestar både i mørebispet og andre stader som har meldt seg ut, seier ho.
- Les også:
Manglande respekt
LLH-leiar Bård Nylund meiner Ingeborg Midttømme utviser lite respekt for det liberale fleirtalet i kyrkja i spørsmålet om homofile ekteskap.
Foto: LLHLandsforeningen for lesbiske og homofile (LLH) ser ikkje noko gale i at homo-kritiske prestar meldar seg ut av fagforeininga si. Det seier leiar Bård Nylund.
– Alle kan velje kor dei er organiserte, så det legg vi oss ikkje oppi, seier han.
Samstundes meiner han at handlinga er eit uttrykk for mangel på respekt for meiningsmotstandarar.
– Dei konservative prestane i Presteforeininga har bede om respekt for sine syn og har fått det. Men dei same prestane viser lite respekt tilbake, seier han.
– Bispemøtet har avklart at det ikke er i strid med læren at to av samme kjønn kan inngå ekteskap, og då er det logisk av Presteforeininga å føre dette vidare, seier LLH-leiaren vidare.
