Hopp til innhold

Gjer deg klar til tett nase og rennande auge

Vinteren heng framleis over oss. Men eitt tydeleg – og plagsamt, vårteikn snik seg fram: Pollen.

Hyllene på apotekene er fulle av allergimedisin.

Allergimedisinen står klar på apoteka. Apotek 1 merkar at folk hentar ut meir enn før.

Foto: Øyvind Sandnes / NRK

Er du allergikar og vil for all del unngå tett nase og rennande auge? Då bør du starte med medisinane dine no.

Det seier pollenanalytikar i Norges Astma- og Allergiforbund, Hallvard Ramfjord.

– Det er først og fremst nord på kysten av Vestlandet at sesongen er i gang, men allergikarar langs kysten i heile Sør-Norge bør starte opp med medisinar no, seier han.

Ørsta er først ute

Av alle målestasjonane til Norges Astma- og Allergiforbund er det den i sunnmørskommunen Ørsta som er tidlegast ute med å vise at pollenproduksjonen er i gang i år, ifølgje Norges Astma- og Allergiforbund, NAAF.

Tre i ørsta

Ørsta på Sunnmøre er første staden i landet der det er registrert pollenproduksjon. Men snart følgjer resten av kysten etter.

Foto: Arne Flatin / NRK

Hakk i hæl følgjer Førde og Bergen og kystområda i Sør-Norge.

– Men det er berre kort tid før resten av landet følgjer etter, seier Ramfjord.

Forbundet har no starta opp si daglege nasjonale pollenvarslingsteneste.

Det er modninga av blomsterstandane hos tresortane or og hassel som gjer at pollensesongen no er i gang.

Ulike medisinalternativ

Ifølge NAAF har over 1 million nordmenn pollenallergi.

Pressesjef i Apotek1, Silje Ensrud, seier at dei har merka at stadig fleire hentar ut allergimedisin no.

– Det er viktig å starte tidleg, seier Ensrud.

Pressesjef i Apotek 1, Silje Ensrud.

Pressesjef i Apotek 1, Silje Ensrud.

Foto: Tommy Borge Arnesen / Tommy Borge Arnesen

Ho oppmodar også folk til å ta medisinen kvar dag gjennom sesongen, sjølv om ein i periodar kan ha få eller ingen symptom.

I samråd med lege kan ein også få ein allergivaksine som verkar over fleire år, seier Ensrud.

Stadig tidlegare sesong

Det er normalt at sesongen er i gang langs av kysten på Vestlandet no i midten av februar, seier Ramfjord.

– Men trenden sidan vi starta målingane på 80-talet viser at sesongen startar stadig tidlegare.

Sidan den gong ser vi at pollensesongen no startar nesten ein månad tidlegare enn då vi starta målingane, seier pollenanalytikaren.