Smila er breie i Sykkylven og det er ikkje rart. Her tener dei nemleg pengar på koronaen.
Då landet stengde ned i mars var stemninga i møbelkommunen dyster og folk var livredde for framtida. Arbeidsløysa var på 27 prosent.
– Det var ei forferdeleg kjensle å risikere å stå utan jobb, seier Ole Andre Eikrem. Både han og kona Anja Skram Eikrem jobbar på hjørnesteinsbedrifta Ekornes og begge blei permitterte.
Sykkylven er ei av dei mest sårbare kommunane i landet fordi dei er så avhengige av møbelindustrien. Med møbelnæringa nede for teljing var heile bygdesamfunnet ramma. I fleire familiar blei både mor og far permitterte og folk lurte på om dei måtte flytte.
No er situasjonen snudd på hovudet.
Utnytta munnbind-krisa
Medan det var krise i møbelbygda, var det også desperat mangel på smittevernutstyr.
Sunnmørske grundarar greip ballen. Syarane frå Ekornesfabrikken blei henta tilbake på jobb for å sy smittevernfrakkar og munnbind i ull.
– Det var eit kjærkome oppdrag i ei tid då vi hadde alt for lite ordrar, seier produksjonsdirektør Ola Arne Ramstad.
Ein annan bedriftsleiar i bygda gjekk endå lengre for å utnytte mangelen på smittevernutstyr. Lars Einar Riksheim starta sin eigen munnbindfabrikk, som i dag blei opna av statsministeren.
– De fortener applaus, seier Erna Solberg. Ho fekk æra av å klippe snora.
Bedrifta Riksheim jobba i har spesialisert seg på å lage maskiner til møbelindustrien, men mista oppdraga sine. Då fekk Riksheim kanskje den sprøaste ideen han har hatt nokon gong.
Måtte skaffe millionar på eitt døgn
Med null kunnskap om å lage kirurgiske munnbind til helsepersonell, bestilte han fabrikkutstyr i Kina for å starte slik produksjon.
Han hadde eitt døgn på seg til å skaffe millionane det kosta. 28 kasser med maskindelar kom frå Kina og sunnmøringane måtte finne instruksjonsvideoar på You Tube for å skru det saman.
Bedrifta har no ordre på å lage 19,5 millionar munnbind.
– Det er kjekt å kunne bidra til å bygge fleire arbeidsplassar, seier Lars Einar Riksheim.
Treng hundrevis av arbeidarar
Det er hektiske dagar både på smittevernfabrikken og i møbelindustrien. Det viste seg at nordmenn nytta koronanedstenginga til oppussing i heimen. Dermed ville dei også ha nye møblar. Ekornes åleine har hatt ei auke i salet på 40 prosent.
Neste år treng Sykkylven om lag 150 nye arbeidarar. Det viser ei kartlegging blant bedriftene. For å få tak i nok folk leiter dei etter folk i heile landet.
– Det er kamp om dyktige folk. Det trengst fleire ingeniørar og det er ikkje berre og berre å finne dei lokalt, seier Åsne Folstad, dagleg leiar i Sykkylven næringsutvikling.
For Eikrem som var permittert i mars, går no dagane av seg sjølv.
– Eg har ikkje tid til å tenke på anna enn jobb. Salet har eksplodert, ler Ole Andre Eikrem.