– Fleire leikeapparat var potensielle dødsfeller

Apparata med dei mest alvorlege feila er fjerna. Andre er blitt utbetra. Og barna har fått ei forklaring på kvifor dei har færre leikeapparat enn dei hadde før.

– Leikeapparata var ikkje så veldig trygge, seier Synne Lervåg Sveås (5) i Sunde barnehage.

• Les også: Kan bli kvalt i norske lekeapparater

– Mange får ei overrasking

Det er Ole Christian Wiig i firmaet Lekeplassinspektøren som har gjennomført granskinga. Han seier at tilstanden på norske leikeplassar varierer mykje.

– Nokre kommunar har god styring. Men mange får seg ei grundig overrasking når det blir gjennomført eit grundig tilsyn, seier Wiig til NRK.

Wiig meiner Sula kommune er langt frå nokon versting. Han meiner denne kommunen på Sunnmøre truleg representerer gjennomsnittet.

• Les også: Feil ved mange lekestativ
• Les også: Lekeapparat ble aldri testet

36 dødsfeller

NRK har sett alle rapportane frå dei 8 kommunale skulane og barnehagane i Sula. Til saman er der 30 manglar ved leikeapparat som inneber dødsrisiko. Berre på Sunde barnehage er tretten forhold markert med ein raud A i rapporten. A representerer fare for død.

I rapporten blir det lagt fram bilete av ei oransje sjørøvarskute. Eit tau går frå skuteskroget og fram på baugspydet. Her var det fare for kveling ved fastklemming av hovud og hals, heiter det i rapporten, med henvisning til farevurdering ved opningar mellom 90 og 230 millimeter.

• Les også: Skader seg uten at de voksne ser det

Leikarhytter og sklier

På same barnehage er det ei leikarhytte, forma som eit spisst telt. Her er opningane forma slik at barna kunne få klemt fast hovudet eller halsen. Dette tilfellet får også ein raud A, som inneber dødsrisiko.

Den raude A-en blir også brukt i samband med ei sklie. Her var det fare for at kle og snorer kunne hekte seg fast, noko som også representerer kvelningsfare. Heile tre A-ar er knytte til den same sklia.

– Forskrekka

Kvelningsfare var det også i samband med eit klatrestativ. Konsulenten tilrår at opningane i klatrestativet blir gjort mindre, slik at det ikkje lenger er fare for kveling.

– Vi blir sjølvsagt forskrekka over avvika. Her er nokre gamle leikeapparat, og det har kome nye forskrifter. Vi har ikkje heilt klart å henge med, seier styrar Britt Kleppe.

– Ikkje førebudde på mengda

Tidlegare var det Sula kommune som kontrollerte leikeapparata sjølve. Denne gongen leigde dei inn ein inspektør.

– Vi visste at det var ein del å ta tak i. Men vi var ikkje førebudde på at det var så mykje, seier kommunalsjef Jørn Agersborg.

No må Sula kommune ut med store summar til både reparasjonar og til erstatning for leikeapparat som er fjerna.

– Kanskje vi kan få oss eit nytt slott og ein ny bil der borte, seier Synne Lervåg Sveås (5).