Store deler av Møre og Romsdal blei råka av feil i mobilnettet

Feilen blei oppdaga rundt klokka 15.00 fredag.

Like før klokka 16.00 blei feilen funnen og mobilnettet var på veg tilbake.

– Det er sett i verk tiltak som ser ut til å hjelpe, sa Bård Flaarønning, pressevakt i Telenor, til NRK like før klokka 16.00.

Rundt 16.30 viste dekningskartet til Telenor at det framleis var problem over heile Møre og Romsdal.

Klokka 16.45 skal alle ha fått mobilnettet tilbake.

– No er all trafikken tilbake og vi beklagar sjølvsagt den ulempa dette førte til. Utfallet skuldast ein teknisk feil i systemet vårt og feilen varte i 45 minutt, seier Flaarønning.

Det var berre mobilnettet som blei råka og ikkje breiband.

Det betyr at enkelte kan ha hatt problem med å ringe, sende tekstmeldingar og bruke 4G eller 5G på mobil i området.

Problem med kassasystem

Feilen i mobilnettet skal også ha gått utover kassasystema i butikkar som har hatt ei Telenor-løysingar. Fleire stadar i fylket skal det ha blitt køar som følge av dette.

Ålesund kommune hadde nokre mindre dekningsutfall på grunn av feilen, men melder at det ikkje var snakka om store problem.

Avisa Tidens Krav melder at dei var utan telefon og nett i sine lokale i Kristiansund i rundt 15 minutt.

Romsdals Budstikke skriv at kjøpesenteret Roseby i Molde og Apotek1 skal ha blitt råka av feilen.