Klubben fostra Karsten Warholm - no er eit nytt stortalent på gang

– Eg trur ikkje det er noko grense enno i alle fall. Så lenge eg klarer å halde meg skadefri og får trene godt så er det ingen grenser trur eg.

Lovise Skarbøvik Andresen har nettopp fått spørsmål om kor langt ho kan nå. Stortalentet er tatt ut på landslaget i friidrett for seniorar. Ho skal springe 60 meter hekk innandørs under Nordenkampen til helga.

Og 20-åringen gler seg til å konkurrere for Noreg på dette nivået.

– Det er veldig gøy å få representere Noreg på noko anna enn aldersbestemte klasser.

• Fleire nye supertalent veks fram bak dei norske friidrettsstjernene. Andreas Fjeld Halvorsen knuste Jakob Ingebrigtsen med hans eiga oppskrift.

I Warholm sine fotspor

Lovise Skarbøvik Andresen er frå Ålesund, men spring for Dimna IL i Ulstein. Det namnet kling godt i norske friidrettsentusiastar sine øyre. Veldig godt.

Det var denne klubben som fostra Karsten Warholm. OL-vinnar med verdsrekord og VM-gull tre gongar på 400 meter hekk. Ein av dei største friidrettsstjernene i verda.

No er ein ny hekkeløpar frå Dimna IL i ferd med å ta spranget inn på den internasjonale arenaen. Sportsleg leiar Arve Hatløy trur Lovise Skarbøvik Andresen kan nå langt.

– Ho er på eit internasjonalt nivå allereie. Og ho er vel den beste vi har hatt etter Karsten. Det er opp til ho sjølv kor langt ho kan nå.

Og mannen som følgde den unge Karsten Warholm på nært hald gjennom mange år, er stolt over at klubben har klart å fram ei ny hekkeløpar på toppnivå.

– Det er veldig kjekt at vi får til det. Det er mange som har jobba hardt, ikkje minst Lovise sjølve. Alle som trener i lag med ho, skal ha litt av æra for at vi får fram nye stjerner.

Satsar for fullt

Persen på 60 meter hekk innandørs er 8.15. Det er framleis eit stykke ned til den norske rekorden til Christina Vukicevic frå 2011. Den er på 7.83.

Men Lovise Skarbøvik Andresen er i framgang. Det går stadig fortare. For no satsar ho for fullt.

– Eg går ikkje på skule lenger. Eg har tatt meg eit friår. No blir alt fokus og all energi retta inn mot treninga.

• Det gror godt i norsk friidrett for tida. På dryge to veker senka Henriette Jæger si eiga rekord med over eitt sekund.