Historia om Nordøyvegen
Nordøyvegen skal gi fastlandssamband til 2700 innbyggjarar på øyane Lepsøya, Haramsøya, Flemsøy/Skuløy, Fjørtofta og Harøya (Nordøyane).
- 1963Folkemøte
På eit folkemøte på Lepsøya blir dei første planane om bru frå fastlandet til Lepsøy kjent. Dette er starten på prosjektet som seinare blir Nordøyvegen.
- 1966Kostar 6 millionar
Ingeniørfirmaet Sam Lorgen gjer ei utgreiing om det skal byggast bru eller rørtunnel over Lepsøyrevet. Begge alternativa er kostnadsrekna til 6,6 millionar kroner, men bru vert valt fordi den har lågare kostnadsrisiko. Også studentar i Trondheim blir spurt om å jobbe med prosjekteringa.
- 1971Tru på realisering
Bru mellom Skjelten og Lepsøya blir tatt inn i plandokumentet til Vegvesenet. Samferdselskomiteen på Stortinget uttalar at brua bør bli realisert i perioden 1978-79.
- 1984Blir ikkje prioritert
Fylkestinget prioriterer ikkje å få Lepsøybrua inn i vegplanen for 1986-89, og det kjem framlegg om at prosjektet skal utgreiast saman med Aursundbrua i Aure i planen 1990-1993. Detaljplanane viser at brua vil koste 54 millionar kroner. Pris per innbyggjar er 90.000 kroner.
- 1987Stiftar Nordøyvegen as
Vegkontoret legg fram forprosjekt. Det som tidlegare har vore Lepsøybrua, blir no gradvis Nordøyvegen, med undersjøiske tunnelar og bruer. Dette er same året som dei undersjøiske Ålesundstunnelane vert opna. I oktober blir Nordøyvegen as stifta. Privatpersonar og næringslivet kjøper aksjar. Heile prosjektet har ein prislapp på 420 millionar kroner.
- 1989Stortinget seier ja
Stortinget sier ja til Lepsøybrua i neste planperiode. Førsetnaden er at Møre og Romsdal fylkesting gir prosjektet høg prioritet. På Lepsøy går flagget til topps på skulen og det vert bygd ein symbolsk modell av brua på skuleplassen. Alle reknar med byggestart i 1990.
- 1994Arbeidet går seint
Vegdirektoratet godkjenner planen for Lepsøybrua, men det skjer lite politisk og det vidare arbeidet stoppar opp. Ordførar i Haram, Robert Hurlen (H), er frustrert over at det tar så lang tid.
- 1997Nordøyvegen på topp
Fylkestinget vedtek å sette Nordøyvegen på topp og tilrår søknad om bompengefinansiering.
- 2002Kjempar for ferjeavløysingsordning
Forkjemparane for Nordøyvegen ynskjer at pengane som blir spart på å legge ned ferjene, skal vere med på å finansiere prosjektet. I fleire år har det blitt drive lobbyverksemd mot Stortinget for å få på plass ordning med ferjesubsidiar. Samferdselsminister Torild Skogshom (V) blir invitert på synfaring på øyane. Same år gjer Stortinget vedtak om eit prinsipp for å bruke ferjeavløysingsmidlar i vegprosjekt.
- 2002/2003Startar utgreiing
Arbeidet med kommunedelplan med konsekvensutgreiingar startar. Nordøyvegen får dispensasjon for stigning i dei undersjøiske tunnelane, som er høgare enn vegnormalen. Ordførar i Haram, Oddbjørn Vatne (Sp), har stor tru på at vegen skal kome.
- April 2005Prioriterer Nordøyvegen
Fylkestinget vedtek å prioritere Nordøyvegen på topp i Nasjonaltransportplan 2006-2015. Kostnaden for vegen er på 1,4 milliarder kroner. Fylkestinget meiner at sambandet må ferdigstillast innan 2015
- 2009Feststemning
Nordøyvegen går frå å vere riksveg til fylkesveg som fylgje av regionreforma. Fylkestinget søker om statleg lån med rentekompensasjon. Prosjektet blir vurdert til å vere fullfinansiert og det er feststemning. Kostnaden er no på 1,8 milliarder kroner. Folket på øyane ser fram til fastlandssamband, fordi dei ofte opplever at ferjene er innstilte.
- 2011Hubro kan stoppe vegen
Søknaden om å få krevje inn bompengar på førehand for dei reisande på ferja blir godkjent i Stortinget, men eit uventa problem dukkar opp. Fylkesmannen meiner Nordøyvegen kjem i konflikt med hubro på Fjørtofta, som er ein sterkt trua ugleart. Løysinga blir ein miljøtunnel.
- 27. august 2012Historisk dag
I eit ekstraordinært fylkesting seier politikarane ja til å bygge Nordøyvegen. Kostnaden har auka kraftig og prosjektet kostar no 2,6 milliardar kroner.
- 8.desember 2015Vil utsette prosjektet
Fylkesrådmann Ottar B. Guttelvik vil utsette bygginga av Nordøyvegen på grunn av høg lånegjeld og ein kostnadssprekk på prosjektet. Fylkestinget seier nei til forslaget og vedtek nok ein gang bygging. Kostnaden er no oppe i 3,2 milliarder kroner.
- April 2016For bratte tunnelar
Nordøyvegen får ein kalddusj når Vegdirektoratet seier nei til å godkjenne dei undersjøiske tunnelane fordi dei har for bratt stigning. Dermed må prosjektet tilbake på teiknebordet, før det blir godkjent.
- September 2016Nedslåande rapport
Ein kvalitetssikringsrapport frå Oslo Economics konkluderer med at tunnel og bru-prosjektet manglar fleire hundre millionar kroner. Næringslivet i Sandøy har imidlertid bestilt sin eigen rapport, og den konkluderer heilt annleis.
- 12. desember 2016Jublar for nytt vedtak
Nok ein gang seier fleirtalet i fylkestinget ja til Nordøyvegen. Dei frammøtte flaggar og jublar. Prosjektet har no ein kostnad på nærare 3,5 milliarder kroner
- 20. juni 2017Stortinget gir grønt lys
Stortinget godkjenner bompengeproposisjonen for Nordøyvegen. Same dag blir dei fire førebuande kontraktene på bygginga lyst ut.
- 29. september 2017Første spadetak
Leiar i samferdselsutvalet i Møre og Romsdal, Kristin Sørheim (Sp), tar første spadetaket på det som skal bli Nordøyvegen. Det er ein høgstidsdag med mange talar og hundrevis av frammøtte.
- Juni 2018Milliardsprekk
Pristilboda frå hovedentreprenørane er langt over budsjettet og det ligg an til ein kostnadssprekk på ein milliard kroner. Skanska vinn anbodet, men prosjektet blir sett på vent. Arbeidet med å finne pengane som manglar startar.
- 6. november 2018Auke bompengane
Fylkeskommunen har møte med samferdselsminister Jon Georg Dale (Frp). Eit forslag om å forlenge bompengeinnkrevinga frå 20 til 40 år vert skrinlagt. I staden gir statsråden positive signal om å auke innkrevinga i fem år og auke taksten. I tillegg vil ein legge ned hurtigbåten og bruke desse pengane til vegbygging.
- 12. november 2018Vil avlyse prosjektet
Fylkesrådmann Ottar B. Guttelvik foreslår å avlyse anbodskonkurransen. Han meiner at Nordøyvegen kjem til å koste 5,6 milliardar kroner og vil føre til full investeringsstopp dei neste 10-12 åra.
- 19. november 2018Siger i første runde
Ei gruppe politikarar i Samferdselsutvalet meiner fylkesrådmannen sine tal er feil. Dei legg fram eit nytt talgrunnlag på 5,1 milliardar. Fleirtalet i utvalet seier nei til å stoppe anbodskonkurransen og ja til å bygge Nordøyvegen.
- 26. november 2018Ja, trass åtvaringar
Trass anbodssprekk på éin milliard og varsel om overstyring av økonomien, seier fleirtalet i fylkesutvalet ja til å bygge Nordøyvegen.
- 5.desember 2018Feil i reknestykket
Fleire i dei økonomiske fagmiljøa meiner at fylkeskommunen har feil i reknestykket, fordi dei ikkje har tatt omsyn til inflasjonsutviklinga dei neste 40 åra. Fylkesrådmann Ottar B. Guttelvik legg fram nye berekningar, som viser at skilnaden mellom bygging av Nordøyvegen og å halde fram ferjedrifta, ikkje er så stor som først rekna ut. Likevel meiner fylkesadministrasjonen at anbodskonkurransen bør avlysast. Tilhengarane av Nordøyvegen er frustrerte over at dei nye utrekningane ikkje kjem før no.
- 11. desember 2018Skjebnedag for Nordøyvegen
Denne dagen skal fylkestinget avgjere om Nordøyvegen skal byggast eller om fastlandssambandet skal stoppast. Eit fleirtal på 26 seier ja.