Politiet fekk melding om at ein bil låg i sjøen klokka 12.29. Klokka 13.25 stadfesta politiet at ein person vart funnen omkomen. Det var redningsdykkarar som henta opp vedkomande frå sjøen.
Operasjonsleiar Arild Reite seier at dei set ulykka i samanheng med ein sakna person, som ikkje møtte opp til ein avtale.
Politiet fekk ei bekymringsmelding klokka 11.30 og var i ferd med å sette i gang ein leiteaksjon. Då politiet ein time seinare fekk melding om bilen i sjøen, sette dei sakene i samanheng.
Utforkøyringa har skjedd på fylkesveg 62 i Øksendal.
Det skal ikkje ha vore vitne til hendinga.
Operasjonsleiar Arild Reite i politiet seier at dei etterforskar dette som ei trafikkulykke.
Årsaka er så langt ikkje kjend.