Det blei verken biff eller tapas då 15-åringane Aron og Iver Kvalsund Remøy blei konfirmerte i Herøy på Sunnmøre nyleg.
Dei to tenåringsgutane er ivrige hobbyfiskarar – og bestemte seg tidleg for at dei sjølve ville ordne middagsmaten til festbordet.
– Vi tenkte vi kunne fiske fisken sjølv, så då var ikkje det noko problem. Vi tenkte det kom til å bli ein god torskemiddag, seier Iver Kvalsund Remøy.
Aron (til venstre) og Iver Kvalsund Remøy er syskenbarn og kompisar. Begge vil bli fiskarar.
Foto: Arne Flatin / NRKDei to gutane er syskenbarn og feira i lag, og to dagar før reiste dei ut med båten til faren og onkelen. I løpet av kvelden drog opp rundt 20–30 torskar.
– Fisk er godt, og når vi har sjansen til å få tak i gratis middag, så gjekk vi for det, seier Aron Kvalsund Remøy nøkternt.
Det var Vestlandsnytt som fortalde om dei unge fiskarane først.
Det blei store mengder fisk då gutane reiste på sjøen.
Foto: privatTorsk bakt i champagne
Då fisket og sløyinga var ferdig, sto dei igjen med rundt 20 kilo fersk torskefilet. Med innleigd kokk blei menyen ein konfirmasjonsfest verdig:
- Champagnebakt torsk med sylta raudløk
- Potet- og sellerirotpurè
- Broccolini
- Smørkokt gulrot
- Sandefjordsmør
Kokken Vegard Longva lagde maten. Til dagleg arbeider han på ringnotsnurparen M/S Strand Senior frå Ålesund.
Han seier mange unge rynkar på nasen av fisk, og er glad for at 15-åringane likevel reiste på sjøen for å skaffe festmat.
Kokken Vegard Longva synest det var spenstig og tøft å servere fisk i konfirmasjonen.
Foto: privat– Det synest eg er heilt fantastisk. Det å servere fisk til ein konfirmasjonsmiddag er spenstig og tøft, seier han, og legg til at svært mange vel indrefilet, svinenakke eller roastbeef.
KVIT DUK OG FESTMAT: Ein porsjon sjølvfiska torsk i champagne med potet- og rotmos, smørdampa gulrot, brocollini og sandefjordsmør.
Foto: privatHar sommarjobb på sjøen
Dei to syskenbarna på 15 år har vore ihuga hobbyfiskarar i mange år. I juni skal dei ha praksisveke på sjøen og har også sikra seg sommarjobb.
Planen for begge er å bli profesjonelle fiskarar.
Sjølv om dei sjølve er veldig glade i fisk, vedgår dei at det var litt spesielt å ordne sin eigen festmat.
Dei fekk skryt frå mange av gjestene, og syntest sjølv det blei eit herremåltid.
– Eg veit ikkje om alle var begeistra, men dei smakte no, og likte det ganske godt, seier Aron Kvalsund Grimstad.
Iver (til venstre) og Aron Kvalsund Remøy medan dei ønskte dei 34 gjestene sine velkomne til konfirmasjonsfest.
Foto: privat