Store skader
Det er ikkje råd å få telefonkontakt med folk på Hellesylt måndag kveld, men Torbjørn Sylte frå Stranda tok tidlegare i dag turen til bygda for å sjå korleis det står til på byggeplassen der dei held på å lage ny cruisekai.
– Eg har også ei campingvogn som står fast på Hellesylt camping, men ho er heldigvis no trygt vinterlagra, fortel Sylte til NRK.
Les også:
Ingen heile vogner
Byggeplassen til Sylte på Hellesylt såg fin ut, men resten av bygda er blitt hardt herja.
– Campingplassen såg ut som eit katastrofeområde. Der er ikkje ei einaste vogn som ikkje er skada. Vogner var slengt i alle fall 50 meter bortover. Det såg heilt forferdeleg ut, seier Torbjørn Sylte.
Og det er ikkje berre campingplassen som fekk merke naturkreftene.
– Vinden er hard der inne, men dette er heilt ekstremt. Hellesylt fekk seg ny kunstgrasbane i fjor. Men no var det ikkje meir kunstgras igjen. Det var skrella av og røska i hop som ein bylt, fortel han.
Mjølkespreng
I Liabygda i Stranda har dei også hatt store utfordringar etter «Dagmar» . I eit fjøs venta 15 kyr med mjølkespreng eit heilt døgn på å bli mjølka.
– Det gjekk 25-26 timar frå siste mjølking før vi fekk att straumen og kunne mjølke igjen. No får vi berre kome oss i rytme, og håpe det er lenge til neste gong det skjer, seier bonde Jon Geirmund Lied.
Knuste bilar
I nabokommunen Stordal har ordførar Charles Tøsse (H) og dei andre innbyggjarane hatt mykje å henge fingrane i.
– Eg var svært bekymra i natt. Her var folk ute og gjekk som vi måtte jage inn igjen, fortel Tøsse.
Og lista over skadar er lang etter orkanens herjingar. Vanylven er truleg ei av dei kommunane som er hardast råka. Der har dei færraste straum, og telefonnettet ligg nede.
NRK har vore i kontakt med folk på Rovde og i Syvde, og får opplyst at telefonstolpar og høgspentstolpar er raserte, og mange hus og bygningar har fått store skader.