Den danske diktaren var tiltalt for i alt 35 lovbrot, blant anna for å ha skote ein 17-åring i foten. Han tilsto fleire av lovbrota, men hevda at han skaut i sjølvforsvar. Og det fekk han gjennomslag for i retten, melder Danmarks radio.
Men er likevel funnen skuldig i ein mildare del av tiltalen som går ut på at han har «nogens liv eller førlighed» for fare.
Skaut ikkje for å skade
Bakgrunnen for rettssaka var at Yahya Hassan, etter ein periode med trugsmål og overfall, tok med seg ein skarpladd pistol då han skulle kjøpe pizza i Aarhus. Då møtte han 17-åringen, og det utvikla seg til ein episode der Hassan skyt tre skot i bakken. Det eine treffer 17-åringen i foten.
Yahya Hassan seier han ikkje skaut for å skade, men for å forsvare seg.
Aktor la ned påstand om tre år i fengsel, men retten har meint at ei noko kortare straff er passande. Hassan må betale bøter på til saman 40.000 danske kroner, og sakskostnader på nesten 1900 kroner. I tillegg blir Mercedesen og motorsykkelen hans inndregen. Hassan mister også førarkortet i eitt år, skriv Politiken.
Han kjem ikkje til å anke dommen, opplyser forsvararen hans.
Blei kjend over natta
Yahya Hassan blei ei litterær superstjerne i Danmark, då debutboka hans, «Yahya Hassan», kom ut i 2013. Boka selde i over 100.000 eksemplar i Danmark. I boka tok han eit oppgjer med kjønnsrollene i innvandrarmiljøa i Danmark, og si eiga fortid som kriminell.
- Les:
- Les:
På grunn av trugsmål etter at boka kom ut, måtte Hassan ha livvakter døgnet rundt. Men etter kvart sa diktaren frå seg politivaktene fordi han kjende seg ufri. I staden skapte han overskrifter i Danmark om vald og dop. Og han kom med oppdateringar på sosiale medium om at han var truga og var i krig med bandar i heimbyen Aarhus.
Det fekk enkelte til å spørre seg om Hassan var i ferd med å miste kontrollen.
No må Yahya Hassan, som har site varetektsfengsla sidan mars i år, skrive si neste bok frå fengselet.