NRK-legende Vidar Lønn-Arnesen er død

Tidlegare NRK-programleiar Vidar Lønn-Arnesen er død.

Det stadfestar familien hans i ei pressemelding til NRK.

– Det er med stor sorg me må kunngjera at vår kjære, elskede pappa og ektemann brått forlét oss i dag etter kort tids sjukeleie, skriv dei i pressemeldinga.

Lønn-Arnesen var særleg kjent for arbeidet sitt med popmusikk hjå rikskringkastaren.

Mellom anna var han programleiar for «Da Capo» frå 1991 til 2001. Ikkje minst var han programleiar for «Melodi Grand Prix» fleire gonger.

Han gav òg ut fleire album.

Radio-ikon

– Vidar var eitt av dei store radio-ikona i Noreg. Éin som alle, i alle fall i ein generasjon, kjente godt til. Både på stemme gjennom radioen og etter kvart gjennom ei rekke TV-program. Dette er eit av dei store NRK-namna som no er borte.

Det seier Charlo Halvorsen, underhaldningsredaktør i NRK.

Vidare skildrar han Lønn-Arnesen som ein forkjempar for populærmusikk på radio.

– Det er litt rart å tenka på no som det er populærmusikk på radioen heile døgnet, men på 60- og 70-talet var det stor mangelvare. Han var ambassadør for å også spela den musikken som unge folk likte. Det var noko å kjempa for på den tida, seier Halvorsen.

– Han skapte ein revolusjon då han kom til NRK på 60-talet. Han var så levande, ingen kan ta hans plass. Han vann fram med ein entusiasme med heile sitt liv og vesen.

Det seier Gunvor Hals, som jobba tett med Lønn-Arnesen som programleiar hjå NRK i fleire år.

Over 50 år i radio

Før han gjekk av med pensjon frå NRK i 2010, jobba Lønn-Arnesen med radio i over 50 år.

Allereie på guterommet i Horten byrja han å laga nærradio i 1955.

I 1965 gjekk han vidare til å verta fast tilsett i NRK. Allereie same år var han med på å starta programmet «Ti i skuddet».

Då reiste han rundt i heile Noreg og let ungdomane avgjera kva som var dei beste låtane.

– Det er jo artig å vita at «babyen Ti i skuddet» framleis lev i beste velgåande på NRK MP3, over 40 år etter at det starta, sa Lønn-Arnesen til NRK då han gjekk av med pensjon.

Helge Bull-Engelstad tok over som programleiar for «Ti i skuddet» frå 2005 og til programmet vart lagt ned to år seinare i samband med endringar hjå kanalen.

– Vidar uttrykte at han syntest det var gøy at programmet framleis levde på NRK MP3, seier han.

Han syntest det var trist å høyra om bortgangen og peikar på at Lønn-Arnesen betydde mykje for mange radioprogramleiarar.

Lønn-Arnesen klarte heller ikkje å slutta heilt med radio sjølv om han slutta i NRK. I 2018 dukka han òg opp som ein av programleiarane hjå Radio Vinyl.

Fekk Kongens fortenestemedalje

I 2010 fekk den mangeårige programleiaren dessutan Kongens fortenestemedalje.

Den fekk han på ein eigen 70-årsdag.

– Eg har fått gleda av å overrekka deg Kongens fortenestemedalje for ein uvurderleg innsats for norsk musikk, musikkpresentasjon og nyskaping innanfor formidling av musikk, sa dåverande kringkastingssjef Hans-Tore Bjerkaas under utdelinga.