Treng over 800 millionar kroner etter ekstremvêret Hans

– Eg forventar at vi får støtte til dette, seier Marit Hougsrud (Sp).

Ho er ordførar i Sør-Aurdal kommune i Valdres – ei av fleire kommunar som vart hardt råka av ekstremvêret «Hans».

Der låg ungdomsskulen under vatn, eit jordras gjekk tvers gjennom eit bustadfelt og fleire små og større vegar vart øydelagde.

No har kommunen grovrekna på kor mykje ekstremvêret har kosta kommunen.

Sum: 68 millionar kronar.

Forventar at staten tek rekninga

Dei 68 millionane i Sør-Aurdal, er berre ein liten del av potten med skjønnsmidlar som dei flaumråka kommunane på Austlandet har søkt om.

– Vi har ikkje økonomi til å plutseleg kunne ta desse millionane utan vidare, så eg forventar at vi får god hjelp til dette, seier ordføraren i Sør-Aurdal.

Kommunane i Innlandet og Viken fylke anslår at ekstremvêret har kosta dei svimlande 808 millionar kroner.

Medan kommunane i Viken har søkt om 131 millionar kroner i skjønnsmiddel, har kommunane i Innlandet bedt om 677 millionar kroner.

– Berre byrjinga

Ål kommune i Hallingdal har søkt om 25 millionar kroner.

Rådmann i Ål, Karsten Popp Dideriksen, meiner denne summen berre er byrjinga.

– Det vi har søkt om, er det vi har hatt av reelle utgifter så langt. Dette er berre byrjinga, seier Dideriksen.

I Ål gjekk det fleire ras, og «Hans» førte til store øydeleggingar på vegar og infrastruktur. I tillegg hadde kommunen store utgifter til mellom anna evakueringshotell til innbyggarane.

– Vi evakuerte rundt tusen folk, det er 22 prosent av innbyggarane, seier Diderikson.

Også i Nord-Aurdal i Valdres brukte dei store summar på evakuering.

Kommunen har søkt om 15 millionar kroner i støtte. 3 av desse millionane gjekk til hotellutgifter under «Hans».

Vil få dekka mykje

– Det er eit tungt løft for kommunane, både dette året og neste år. Vi er ikkje ferdige med dette enno, seier Anne Kathrine Fossum, kommunal- og samordningsdirektør ved Statsforvaltaren i Innlandet.

I Innlandet er det totalt 29 av 46 kommunar som har søkt om skjønnsmidlar etter «Hans».

Beløpa går frå 204 millionar kroner som Gran kommune har søkt om, til 100 000 kroner som Alvdal har bedt om.

– Dette seier noko om at det er mange som vart råka av uvêret på ulike måtar, nokre hardare råka enn andre, seier Fossum.

Ho fortel at kommunane vil få dekka mykje av beløpet dei har søkt om. Pengane skal bli overført til kommunane i desember.

NRK har forsøkt å få ein kommentar frå kommunal- og distriktsminister Sigbjørn Gjelsvik (Sp) utan hell.

Framleis eigendel

Sjølv om kommunane har bedt om millionar av kroner i støtte, må dei framleis dekke delar av oppryddingsarbeida sjølve.

Eigendelen er på 250 kroner per innbyggar. Kommunar som har utgifter som går over 250 kroner per innbyggar, kan få dekka halvparten av utgiftene.

Det gjer til at fleire kommunar fell utanfor ordninga til departementet.

Sjølv om beløpet ikkje er over 250 kroner per innbyggar, har fleire kommunar hatt betydelege meirkostnader som følgje av uvêret.

No ber Statsforvaltaren i Viken departementet om å sjå nærare på dei kommunane som fell utanfor støtteordninga.