Hopp til innhold

Dette kan effektivisere treninga di

LILLEHAMMER (NRK): Er du lei av 4x4-intervall? Forskarar meiner dei har funne svaret på kva økt som er mest effektiv.

Ole Sigurd Rekdahl sykler 30/15-intervall

INTENSIV TRENING: Ole Sigurd Rekdahl (18) merker stor forbetring etter at han la om treninga sin til korte arbeidsperiodar og hyppige pausar.

Foto: Lars Erik Skrefsrud / NRK

Forskarar frå Høgskolen i Innlandet har testa effekten av ein 30/15-intervall. Det går ut på 30 sekund arbeid og 15 sekund kvile i ei periode på ti minutt. Dette gjer ein tre gonger.

– Det ser ut til at ein får lengre tid med høgare oksygenopptak. Med kort pause held pulsen seg høgt oppe heile tida og det effektiviserer treninga, seier forskar Bent Rønnestad som tidlegare har funne fleire andre metodar for å nå toppforma.

Høgskolen har samarbeida med godt trente syklistar ved Noregs Toppidrettsgymnas og Lillehammer Cykleklubb som har testa modellen. Ei gruppe trente fem minutts-intervall i ei periode og ei anna testa 30/15-modellen.

– Det vi såg var at 30/15-økta gav betre resultat. Betre treningseffekt rett og slett, seier Rønnestad.

Har trua

– Det kostar krefter. Det er skikkeleg slitsamt og utruleg moro, seier Ole Sigurd Rekdahl.

18-åringen er terrengsyklist og elev på tredje året ved NTG. Han har nettopp fullført ein intensiv intervalløkt i motbakke. Tung pust vitnar om at treninga er langt frå behageleg. Men Rekdahl er ikkje i tvil om at det er effektivt.

– Du blir vant med å køyre på ein aggressiv måte. Du forbetrar både uthald og «eksplosivitet». Eg trur dette er ei treningsmetode som blir brukt i lang tid framover, seier han.

Gode resultat

Høgskolen jobbar no med å utvikle fleire intervalløkter som gir lengst mogleg tid med høgt oksygenopptak.

Bent Rønnestad, professor Høgskolen i Innlandet

FRAMGANG: Rønnestad seier intervallforma kan gi framgang i mange utholdenhetsidretter.

Foto: Lars Erik Skrefsrud / NRK

Ifølge Bent Rønnestad funkar metoda like godt også om ein spring eller går langrenn. Studien er gjort på godt trente personar. Men Rønnestad utelukkar ikkje at metoden kan vere effektiv for dei som ikkje er i toppform også.

– Fordelen med å vere utrent er at det alle meste hjelper, men forskjellane blir meir tydelege jo betre trent du er. Til dømes for ein birkebeinar vil dette vere et godt alternativ, forklarer Rønnestad.

– Ikkje for alle

Ine Wigernæs ved NTNU på Gjøvik seier studien er spennande, men har ikkje så stor tru på at dette er ei treningsform som passar folk flest.

Ine Wigernæs

SKEPTISK: Ine Wigernæs trur treningsforma vil vere mest effektiv for dei som er godt trente frå før.

Foto: Stein S. Eide

– Korte intervall kan vere artig om du kjenner kroppen din veldig godt og kva fart du kan greie å halde. Med berre 15 sekunds pause held du jo pulsen oppe. Det blir hardt og vondt, men toppidrettsutøvarar likar jo det, seier Wigernæs.

For alle andre trur ho det blir enklare å meir motiverande trening med litt lengre drag. Ho meiner ein må tenke på kva som er gjennomførbart i kvardagen.

– Det må vere gøy for at du skal gidde å gjennomføre. Når du blir supergodt kjent med kroppen din kan du begynne med korte intervall, seier ho.

TUNGT: NRK var med Bent Rønnestad på trening saman med NTG-elev Ole Sigurd Rekdahl og medelevane.

Les også:

Flere saker fra Innlandet